ऋण असुलीबाट समस्याग्रस्त १२ सहकारीका २३५ जनाले पाए रकम

काठमाडौं । समस्याग्रस्त सहकारी व्यवस्थापन समितिले  १२ समस्याग्रस्त सहकारीको २३५ जनाको बचत फिर्ता गरेको छ । समितिका अनुसार  साना बचतकर्ताको रकम फिर्ता गरिएको हो  ।
सरकारले समस्याग्रस्त सहकारीको ऋण असुलीबाट प्राप्त भएको रकम नै पीडित बचतकर्तालाई फिर्ता गरिएको स्पष्ट पारेको छ ।
पहिलो चरणमा थोरै बचत रकम भएका बचतकर्ताहरूलाई रकम फिर्ता गरिएको समितिले जनाएको छ । यसरी नै क्रमश बचतकर्ताको रकमका आधारमा वर्गीकरण गरेर रकम फिर्ता गरिने छ । 
समस्याग्रस्त सहकारी संस्थाहरुबाट ऋण असुली र सम्पत्ति व्यवस्थापनबाट प्राप्त रकमबाट सम्बन्धित सहकारीका बचतकर्ताहरुलाई बचत फिर्ता गर्ने कार्य प्रचलित कानुनी व्यवस्था बमोजिम निरन्तर रुपमा संचालन भइरहेको छ ।
समितिका अनुसार कृषि विकास सहकारीबाट ४ जनाले, गोरखा सेभिंगका ११ जनाले रकम फिर्ता पाएका छन् । 
आईडियल यमुनाका ६ जनाले र कान्तिपुर कोअपरेटिभका ८० जनाले रकम फिर्ता पाएका छन् । यसैंगरी नेपाल वित्तियका १२ जनाले, ओरेन्टलका ३७ जना जनाले र  शिव शिखरका ६२ जनाले रकम फिर्ता पाएका छन् । 
यसैंगरी पशुपतिका ४ जना, तपाईं हाम्रो सहकारीका १० जना र स्ट्यान्डर्ड सेभिङका ४ जनाले रकम फिर्ता पाएका छन् । त्यस्तैगरी लालीगुराँसका १३जना र गौतम श्रीका १ जनाले गरी कुल २३५ जनाले रकम फिर्ता पाएको बताइएको छ ।