विदेशी मैदानमा चम्किँदै महिला फुटबलको नयाँ पुस्ता

news24 दैनिक । केही वर्ष अगाडिसम्म अन्तर्राष्ट्रिय लिगमा नेपाली महिला फुटबलर देख्नु दुर्लभ थियो । सीमित स्रोत र संरचनागत कमजोरीबीच अहिले स्थिति फेरिँदैछ । यसको प्रत्यक्ष उदाहरण हुन् मिडफिल्डर प्रीति राई।

हालै उनले जोर्डनको शीर्ष क्लब अल इतिहादसँग २०२५/२६ प्रो लिग सिजनका लागि अनुबन्ध भइकी छन् । यो खबर फिफा वरीयतामा नेपाली टोलीले १३ स्थानको छलाङ मारेको खुसीसँगै थप उत्साहको कारण बन्यो ।

अल इतिहाद पछिल्ला दुई सिजनका च्याम्पियन टोली हो । प्रीतिको पहिलो खेल अगस्ट २३ मा हुनेछ । उनी १६ वर्षमै राष्ट्रिय टोलीबाट डेब्यु गर्दै गोल र ‘प्लेयर अफ द म्याच’ बनेकी थिइन् ।

प्रीति मात्र होइन, सावित्रा भण्डारी ‘साम्बा’ अष्ट्रेलियाको ए-लिग क्लब वेलिंगटन फिनिक्समा अनुबन्धित भएकी छन् भने उनी युरोपमा खेल्ने पहिलो नेपाली महिला हुन् । 

रेखा पौडेल युएईको आबुधाबी कन्ट्री क्लबबाट खेल्दै २०२४/२५ महिला लिग जितेको टोलीकी सदस्य हुन् । 

पूर्व कप्तान एञ्जिला सुब्बा हाल ग्रीसको निस अट्रोमिटोउ क्लबमा अनुबन्धित छिन् । उनी युरोपमा खेल्ने दोस्रो नेपाली महिला हुन् ।

यी सफलताहरू विदेशमा चम्किरहेका छन्, तर स्वदेशमा भने महिला फुटबलका गतिविधि ठप्प छन् । एन्फाले न त ए-डिभिजन लिग चलाएको छ, न दीर्घकालीन योजना अघि बढाएको छ । धेरै खेलाडी वैकल्पिक रोजगारीमा लाग्न बाध्य छन् ।

अन्तर्राष्ट्रिय अनुबन्धहरूले खेलाडीको करियर मात्र होइन, नेपालको फुटबल साख पनि बढाउँछन् । यो पुस्ताले देखाएको संदेश स्पष्ट छ : उपयुक्त पूर्वाधार र अवसर पाए नेपाली महिला फुटबलको क्षमता असीमित छ ।

जोर्डनमा प्रीतिको पहिलो खेल केवल व्यक्तिगत क्षण होइन - यो नेपाली महिला फुटबलको नयाँ युगको संकेत हो ।