धरहरा टपरी ममलाई दुई लाख जरिवाना

काठमाडौं । काठमाडौँ महानगरपालिकाले सुन्धारास्थित ‘धरहरा टपरी मम’का सञ्चालकलाई खाद्य स्वच्छता मापदण्ड उल्लंघन गरेको पाइएपछि दुई लाख रुपैयाँ जरिवाना गरेको हो । 

धरहरा टपरी ममका सञ्चालकले बिक्रीवितरणका लागि तयार गरेको मममा धातुको औँठी फेला परेको थियो । साथै खाद्य पदार्थको गुणस्तर मापदण्डअनुसार मम नबनाइएको पाइएपछि सो जरिवाना गरिएको महानगर कृषि तथा खाद्य विभागका प्रमुख एवं निरीक्षण अधिकारी नुरनिधि न्यौपानेले जानकारी दिए । 

उनले धरहरा टपरी ममका सञ्चालकले पटक–पटक महानगरपालिकाको निर्देशन उल्लंघन गर्दै खाद्य स्वच्छता र गुणस्तर कायम नगरेको पाइएको उनले बताए । बजार अनुगमनका क्रममा त्रुटि भेटिएपछि बजार व्यवस्थापन तथा अनुगमन ऐन, २०७७ बमोजिम जरिवाना तोकिएको न्यौपानेले बताए ।  

महानगरले उक्त व्यवसायका सञ्चालकलाई जरिवाना रकम सात दिनभित्र बैंकमार्फत जम्मा गरी सोको जानकारीसहित कामपाको कार्यालयमा उपस्थित हुन निर्देशन दिएको छ । साथै, आगामी दिनमा खाद्य स्वच्छता र मापदण्ड पूरा हुने गरी उत्पादन र बिक्री वितरण व्यवस्था मिलाउन पनि व्यवसायीलाई आग्रह गरेको छ ।

- रासस