लाइटिङ प्रणालीमा गडबडीले चार घण्टा उडान अवरुद्ध

काठमाडौं (संवाददाता)– त्रिभुवन अन्तर्राष्ट्रिय विमानस्थलमा शनिबार साँझ करिब साढे ५ बजेदेखि ‘एयर फिल्ड लाइटिङ’ प्रणालीमा समस्या देखिएपछि विमानस्थलको उडान तथा अवतरण प्रणाली ४ घण्टा प्रभावित भएको छ । विमानस्थलका निर्देशक एवं प्रवक्ता रिञ्जी शेर्पाका अनुसार प्राविधिक टोलीले मर्मत गरेपछि राति करिब ९ बजेतिर प्रणाली पूर्ण रूपमा सुचारू भएको थियो ।

लाइटिङ प्रणाली बिग्रनासाथ आन्तरिक तथा अन्तर्राष्ट्रिय उडान प्रभावित भएका थिए । केही विमान आकाशमा ‘होल्ड’मा राखिनु परेको थियो भने केहीलाई वैकल्पिक गन्तव्यतर्फ डाइभर्ट गरिएको थियो । कोरियन एयरको जहाज दिल्ली पठाइयो भने फ्लाई दुबईको जहाज लखनउ डाइभर्ट भएको थियो । बुद्ध एयरका जनकपुरबाट आएको विमान फर्काइयो भने सुर्खेतबाट आएको जहाज पोखरा पठाइएको थियो । कतार एयरवेजसहितका अन्य अन्तर्राष्ट्रिय विमानहरू पनि वैकल्पिक विमानस्थलमा पठाइएका थिए । यसैबीच, स्पाइसजेटले दिल्ली–काठमाडौं उडान रद्द गरेको थियो ।

लाइटिङ प्रणाली बिग्रदा विमानस्थलमा सयौं यात्रु अलपत्र परेका थिए । कतिपय यात्रु उडान रद्द भएपछि टिकट पुनः बुक गर्न बाध्य भए । विमानस्थल प्रशासनले राति ९ बजेसम्मका लागि ‘नोटाम’ जारी गर्दै उडान तथा अवतरण स्थगित गरेको थियो ।

प्रवक्ता शेर्पाका अनुसार प्राविधिक टोलीले समस्या आंशिक रूपमा समाधान गर्दै पूर्ण रूपमा सुचारू गरिसकेको छ । उनले भने, ‘अहिले प्रणाली सामान्य रूपमा सञ्चालनमा छ । तर, समस्या किन आयो भन्ने विषयमा प्राविधिक अध्ययन भइरहेको छ । अध्ययनपछि मात्रै ठोस कारण सार्वजनिक गरिनेछ ।’

विमानस्थलमा राति धावनमार्ग उज्यालो बनाउने ‘एयर फिल्ड लाइटिङ’ प्रणाली विमानहरूको उडान र अवतरणका लागि अत्यावश्यक मानिन्छ । उक्त प्रणालीमा देखिएको समस्या विमानस्थलको नियमित सञ्चालनमा प्रत्यक्ष असर पार्ने भएकाले एयरलाइन्स र यात्रुहरू दुवै प्रभावित भए । चार घण्टा लामो अवरोधका कारण विमानस्थलमा अस्थायी असुविधा र आर्थिक नोक्सानी पनि भएको छ ।

विमानस्थल प्रशासनले भविष्यमा यस्ता प्राविधिक समस्या नदोहोरियोस् भन्ने उद्देश्यले प्रणाली सुधार, नियमित निगरानी र आपतकालीन योजना सुदृढ गर्ने प्रतिबद्धता जनाएको छ । प्रवक्ता शेर्पाले सबै एयरलाइन्स र यात्रुलाई धैर्य राख्न आग्रह गर्दै समस्या समाधानपछि नियमित उडान पुनः सुरु भएको जानकारी दिएका छन् ।