दानबहादुर कार्की ३३औं आइजीपी

काठमाडौं (संवाददाता)– सरकारले नेपाल प्रहरीको महानिरीक्षक (आइजीपी)मा एआइजी दानबहादुर कार्कीलाई नियुक्त गरेको छ । सोमबार साँझको मन्त्रिपरिषद् बैठकले वरिष्ठताको आधारमा उनलाई प्रहरी प्रमुख बनाउने निर्णय गरेको हो ।

आइजी चन्द्रकुबेर खापुङ ३० वर्षे सेवा अवधि पूरा गरी कात्तिक २६ गते अवकाशमा जाने भएपछि सरकारको निर्णय आएको हो । २०५४ चैत १८ मा प्रहरी निरीक्षकका रूपमा सेवामा प्रवेश गरेका कार्कीले गत वैशाख १५ मा एआइजीमा बढुवा पाएका थिए । उनीसँगै राजन अधिकारी, मनोज केसी र सिद्धिविक्रम शाह पनि प्रतिस्पर्धामा थिए । वरिष्ठता क्रमअनुसार पहिलो नम्बरमा रहेका कार्कीले २०८४ चैतसम्म आइजीपीका रूपमा सेवा गर्नेछन् ।

गत भदौ २३–२४ को जेनजी आन्दोलनका क्रममा उपत्यकामा भएको घटनापछि कार्की विवादमा तानिएका थिए । आन्दोलन नियन्त्रणमा कमजोरी भएको भन्दै आयोगमा उनीविरुद्ध उजुरी समेत परेको थियो । त्यसपछिका दिनमा प्रधानमन्त्री सुशीला कार्कीमाथि उनलाई महानिरीक्षकमा नियुक्त नगर्न दबाब बढेको थियो ।

तर, सर्वोच्च अदालतको नजिर र पदानुक्रम मापदण्डका कारण सरकार अन्ततः वरिष्ठताको आधारमै जाने निष्कर्षमा पुगेको हो । गृह मन्त्रालयको प्रस्तावपछि सोमबार साँझ मन्त्रिपरिषद्ले औपचारिक निर्णय गरेको हो ।

कार्की नेपाल प्रहरीका ३३औं महानिरीक्षक बनेका छन् । उनले संगठनलाई व्यावसायिक, अनुशासित र जनमुखी बनाउन प्राथमिकता दिने बताएका छन् ।