सगरमाथा लुम्बिनी इन्स्योरेन्सको बीमा सचेतना कार्यक्रम

काठमाडौं । सगरमाथा लुम्बिनी इन्स्योरेन्स कम्पनी लिमिटेडले बीमाप्रति सर्वसाधारणको बुझाइ र विश्वास अभिवृद्धि गर्ने उद्देश्यले शुक्रबार राजधानीमा बीमा सचेतना वाकाथन सम्पन्न गरेको छ । ‘बीमाः सुरक्षित भविष्यको आधार’ भन्ने मूल नाराका साथ आयोजना गरिएको उक्त कार्यक्रममा करिब १०० जना कर्मचारीले सक्रिय सहभागिता जनाएका थिए ।

वाकाथन कम्पनीको नक्सालस्थित केन्द्रीय कार्यालयबाट सुरु भई नक्साल भगवती मन्दिर–नागपोखरी– गैरीधारा–प्रहरी मुख्यालय– हिल्टन होटल हुँदै पुनः केन्द्रीय कार्यालयमा समापन गरिएको थियो । झण्डै ४ किलोमिटर दूरीको यस यात्राका क्रममा सहभागीहरूले बीमाको आवश्यकता र फाइदाबारे सन्देश फैलाउने उद्देश्यले ब्यानर तथा प्लेकार्ड बोकेका थिए ।

सो अवसरमा कम्पनीका प्रमुख कार्यकारी अधिकृत चंकी क्षेत्रीले यस्ता सार्वजनिक अभियानहरूले नागरिकमा बीमाप्रतिको जागरण बढाउँदै दीर्घकालीनरूपमा राष्ट्र सुरक्षित र दिगो बन्न योगदान पुर्‍याउने विश्वास व्यक्त गरे । उनले भविष्यमा पनि जनसाधारण लक्षित सचेतनामूलक कार्यक्रम निरन्तर सञ्चालन गर्दै जाने प्रतिबद्धता जनाए ।