प्रधानमन्त्री कार्कीविरुद्ध अवहेलना मुद्दा

काठमाडौं । प्रधानमन्त्री तथा परराष्ट्रमन्त्री सुशीला कार्कीविरुद्ध अदालतको अवहेलनाको मुद्दा दर्ता भएको छ । अधिवक्ता प्रेम सिलवालले राजदूत फिर्ता बोलाउने सरकारी निर्णय सर्वोच्च अदालतको अन्तरिम आदेशविपरीत रहेको भन्दै मुद्दा दायर गरेका हुन् । सर्वोच्चले १६ कात्तिकमा राजदूत फिर्ता गर्ने निर्णय तत्काल कार्यान्वयन नगर्न सरकारलाई आदेश दिएको थियो ।

तर भोलिपल्टै परराष्ट्र मन्त्रालयले राजदूतहरूलाई मन्त्रालयमै उपस्थित हुन पत्राचार गरेको थियो । सरकारले अदालतको आदेशविपरीत गरेको भन्दै निवेदन दायर गरिएको हो । सिलवालको निवेदनमा अदालतले आगामी आइतबार पहिलो पेसी तोकेको छ ।

निवेदनमा प्रधानमन्त्री कार्की र परराष्ट्र मन्त्रालय दुवैलाई अदालतको अवहेलनामा कारबाही गर्न माग गरिएको छ । पूर्वप्रधानन्यायाधीशसमेत रहेकी कार्कीविरुद्ध यो पहिलो अवहेलनाको मुद्दा दायर भएको हो ।

यसअघि अधिवक्ता अनन्तराज लुइँटेलले दायर गरेको निवेदन जेनजी आन्दोलनका कारण रिट बाहेक अन्य निवेदन दर्ता नहुने भन्दै सर्वोच्चले दरपीठ गरेको थियो ।

त्यो बेला पनि अदालतले राजदूत फिर्ताको विवादमा आफ्नै आदेश कार्यान्वयन नगरेको आरोपमा परेको अवहेलनाको मुद्दा दर्ता अस्वीकार गरेको थियो । फिर्ता बोलाइएका ११ राजदूतमध्ये लोकदर्शन रेग्मी (अमेरिका), कृष्णप्रसाद ओली (चीन), रमेशचन्द्र पौडेल (कतार), चन्द्रकुमार घिमिरे (बेलायत)ले राजीनामा दिइसकेका छन् । परराष्ट्रले ती राजीनामा स्वीकृत पनि गरिसकेको छ ।