घाइते बोहरालाई प्रधानमन्त्रीको आश्वासन

काठमाडौं । जेनजी आन्दोलनका दौरान दुवै आँखा गुमाएका घाइते सन्तोष बोहरालाई प्रधानमन्त्री सुशीला कार्कीले भेटेकी छन् । महाराजगञ्जस्थित त्रिवि शिक्षण अस्पतालमा मंगलबार भेटेर उनले उपचार अवस्थाबारे जानकारी लिएकी हुन् ।

सुर्खेतको वीरेन्द्रनगर–२ भुरेलीका २८ वर्षीय बोहरा भदौ २४ गते सुर्खेतमै आन्दोलनको भीड नियन्त्रणका क्रममा चलेको गोली लागेर गम्भीर घाइते भएका थिए । गोली लागेपछि उनले दुवै आँखा गुमाएर उपचाररत छन् ।

प्रधानमन्त्री कार्कीले बोहराको शय्या नजिकै बसेर उपचारको प्रगति सुनेपछि परिवारसँग कुराकानी गरिन् । भावुक बनेका बोहराका बाबु चन्द्रबहादुरले छोरालाई यस्तो अवस्थामा पुर्‍याउनेमाथि कठोर कारबाहीको माग गर्दै न्यायको गुहार लगाए । उनले भने, ‘छोरा अब काम गर्न सक्दैन । उसकै भरमा बसेको उसकी श्रीमती, चार वर्षीया नातिनी र हामी बूढाबूढीको सहारा अब टुट्यो । सरकारबाट न्याय पाउनैपर्छ ।’ 

परिवारको पीडा सुनेपछि प्रधानमन्त्री कार्कीले सहानुभूति प्रकट गर्दै आवश्यक सहयोग गर्ने आश्वासन दिइन् । उनले भनिन्, ‘तपाईंहरूलाई धेरै दुःख परेको छ, त्यो म राम्रोसँग बुझिरहेकी छु। हामी पनि आमाबाबु हौँ, सन्तानको पीडा कस्तो हुन्छ भन्ने महसुस गर्न सक्छु। यो समस्या तपाईहरूको मात्र होइन, राज्यको जिम्मेवारी पनि हो । उपचारका लागि सम्भव हुने सबै उपाय लगाइनेछ ।’

प्रधानमन्त्रीले बोहराकी श्रीमती निर्मलाको जीवनयापनका लागि रोजगारी तथा छोरीको शिक्षाबारे सरकार गम्भीर रहेको बताउँदै आवश्यक प्रक्रियाहरू तुरुन्त अघि बढाइने आश्वासन दिइन् । ‘बच्चाको पढाइदेखि घरको आर्थिक व्यवस्थासम्म राज्यले सहयोगको बाटो खोज्छ, तपाइँहरू एक्लो हुनुहुन्न,’ उनले भनिन् ।