कांग्रेसमा गगनको घुर्की

काठमाडौं – नेपाली कांग्रेसमा महामन्त्रीद्वय गगन थापा र विश्वप्रकाश शर्माले फागुन २१ गते हुने निर्वाचनभन्दा अगाडि पार्टीको १५औं महाधिवेशन नभए निर्वाचनमा उम्मेदवार नहुने बताएका छन् । शुक्रबार नेपाली कांग्रेसका संस्थापन पक्षका २८ केन्द्रीय सदस्यको समूहसँगको भेटमा उनीहरूले यस्तो बताएका हुन् ।

भेटमा सहभागी केन्द्रीय सदस्य आङगेलु शेर्पाले निर्वाचनअगाडि महाधिवेशन नभए महामन्त्रीद्वय थापा र शर्माले निर्वाचनमा आफूहरू उम्मेदवार नहुने बताएको जानकारी दिए । ‘हाम्रो मुख्य ध्येय कांग्रेसमा नेतृत्व परिवर्तन गरेर निर्वाचनमा जाने भन्ने हो । महाधिवेशनबिना नयाँ नेतृत्व आउनसक्दैन,’ भेटमा महामन्त्री थापाले भने, ‘महाधिवेशन नभई निर्वाचनमा जाने अवस्था भयो भने हामी निर्वाचनमा उम्मेदवार बन्दैनौं ।’

नेपाली कांग्रेसभित्र महामन्त्री थापा र शर्माले नेतृत्व परिवर्तन नगरी आम निर्वाचनमा जान नसकिने भन्दै सम्भव भएसम्म नियमित नभए विशेष महाधिवेशन गर्नुपर्ने अडान राख्दै आएका छन् । महामन्त्री शर्माले यसअघि नै चुनावअघि महाधिवेशन नभए पदबाट राजीनामा दिने चेतावनी दिएका थिए ।

कांग्रेसमा विशेष कि नियमित महाधिवेशन गर्ने भन्ने विवाद समाधान नहुँदा केन्द्रीय समिति बैठक पटक–पटक सर्दै आएको छ ।