मधेस केन्द्रित ८ दल मिलेर चुनावमा जाने

काठमाडौं(संवाददाता)– निर्वाचनको मिति नजिकिँदै जाँदा मधेसवादी दलहरु पनि चुनाव केन्द्रित हुन थालेका छन् । मधेस केन्द्रित दलहरूको मोर्चा संघीय लोकतान्त्रिक मोर्चाको शनिबार बसेको बैठकले फागुन २१ गतेको चुनावमा मिलेर जाने निर्णय गरेको छ । 

लोकतान्त्रिक समाजवादी पार्टी (लोसपा)को बबरमहलस्थित केन्द्रीय कार्यालयमा शनिबार भएको बैठकले राष्ट्रिय सभाको निर्वाचन र प्रतिनिधि सभा निर्वाचनमा जाने निर्णय गरेको लोसपाका नेता सुरेन्द्रकुमार झाले जानकारी दिए । ‘प्रतिनिधिसभाको चुनावमा सहभागी हुने र आठवटै  घटक मिलेर जाने विषयमा सर्वसम्मतले निर्णय भएको छ,’ उनले भने ।

तर मोर्चाका घटक दलहरु मिलेर निर्वाचनमा भाग लिने भनिए पनि गठबन्धन बनाएर जाने वा निर्वाचन क्षेत्र बाँडेर चुनाव लड्ने भन्नेबारे छलफल भइरहेको मोर्चाका सचिवाचलय संयोजक शिवजी यादवले बताए । ‘मोर्चामा रहेका दलहरुबीच सम्भव भएसम्म पार्टी एकता नै गरेर जानेबारे पनि छलफल भइरहेको छ,’ उनले भने ।  

बैठकपछि मोर्चाका तर्फबाट महन्थ ठाकुरले विज्ञप्ति जारी गर्दै निर्वाचन भयरहित, स्वच्छ, निष्पक्ष तथा शान्त वातावरणमा सम्पन्न हुने वातावरण बनाउन पनि सरकारसँग माग गरेको छ ।

मोर्चामा उपेन्द्र यादव नेतृत्वको जसपा नेपाल, सीके राउतको जनमत पार्टी, महन्थ ठाकुर नेतृत्वको लोसपा नेपाल, रेशम चौधरीको नागरिक उन्मुक्ति पार्टी, राजेन्द्र महतोको राष्ट्रिय मुक्ति पार्टी, हृदयेश त्रिपाठीको जनता प्रगतिशील पार्टी, वृषेशचन्द्र लालको तराई मधेस लोकतान्त्रिक पार्टी र केपी पालुङ्गा नेतृत्वको नेपाल जनमुक्ति पार्टी छन् ।