पशुपति आइरनका मजदुरहरु आन्दोलित

सुनसरी । देशकै प्रमुख इस्पात उत्पादक कम्पनी पशुपति आइरन एण्ड स्टील प्रालीको सुनसरीस्थित उघोगमा कार्यरत मजदुरहरू आन्दोलित भएका छन् । सुनसरीको सोनापुरमा रहेको उद्योगमा काम गर्ने नेपाली तथा भारतीय गरी ५० कामदारले ज्याला र तलब बापतको पैसा नपाएको भन्दै आन्दोलित भएका हुन् । उनीहरूले दैनिक उद्योगमा तलब माग गर्दै धर्ना दिइरहेका छन् ।

उद्योगले शनिबारबाट काम रोकेपछि अलपत्र परेका मजदुरहरूले तलबको माग गर्दा प्रशासन र मजदुर ठेकेदारले गेटभित्र छिर्नै नदिएको मजदुर बताउँछन् । उच्च तापक्रममा काम गर्ने मजदुरहरूलाई उद्योग प्रशासनले उद्योग घाटामा गएको भन्दै एक्कासी काममा नआउन निर्देशन दिएको थियो । तीन महिनादेखि तलब नदिएको उद्योगले शनिबारबाट एक्कासी काममा नआउन निर्देशन दिएपछि ५० भन्दा बढी मजदुर र तीनका परिवार विचल्लीमा परेका छन् ।

तलब भुक्तानीको विषयमा पटक–पटक उद्योग प्रशासन र ठेकेदारसँग कुरा गर्दा आफूहरूमाथि अभद्र व्यवहार भएको र प्रहरी लगाएर उद्योगबाट बाहिर निकालिएको दुखेसो मजदुरुहरूले गरेका छन् । उनीहरूले आफूहरूलाई उद्योग प्रशासनले नियम विपरीत रातको समयमा पनि काममा बोलाएर काम लगाएको र त्यसबापत पाउनुपर्ने ओभरटाइम पैसा पनि नदिएको बताएका छन् । मजदुरले तलब नपाएको विषयमा उद्योग प्रशासनलाई बारबार सम्पर्क गर्दा पनि कुनै प्रतिक्रिया प्राप्त हुन सकेन । उद्योग प्रशासनले समाचार संकलनका लागि गएका सञ्चारकर्मीलाई उद्योग परिसरमा पस्न दिएन भने सम्पर्कमा पनि आउन चाहेन ।

देशकै प्रमुख इस्पात उत्पादक पशुपति आइरन एण्ड स्टील प्रालीले गत शनिबारबाट फलाम तथा छडको उत्पादनको रोकेको छ । जसले गर्दा तलब नपाएका मजदुरहरू विचल्लीमा परेका छन् । पछिल्ला केही वर्ष कम्पनीको व्यापारमा कमी आएको छ ।