प्रधानमन्त्री सचिवालयको १४ दरबन्दी कटौती

काठमाडौं । प्रधानमन्त्री सुशीला कार्कीले विवादित बनेका प्रमुख स्वकीय सचिव आदर्श श्रेष्ठलाई कायमै राखेर सचिवालयमा १४ कर्मचारीको दरबन्दी कटौती गरेकी छन् । श्रेष्ठले पत्नीसहित नातेदारलाई सचिवालयमा नियुक्ति दिलाएको खुलेपछि चर्को विरोध भएको थियो । तर, प्रधानमन्त्री कार्यालयले श्रेष्ठको बचाउ गरे पनि बुधबार सचिवालय पुनर्गठन गरेको हो ।

२० सदस्यीय प्रधानमन्त्रीको सचिवालय अब ६ सदस्यीय बनेको छ । विवादित बनेका प्रमुख स्वकीय सचिव श्रेष्ठ कायमै रहँदा उनकी पत्नी संगीता श्रेष्ठ भने सचिवालयबाट हटाइएकी छन् । प्रधानमन्त्री कार्यालयका सहसचिव हेमराज अर्यालले प्रधानमन्त्रीको सचिवालयमा कार्यरतमध्ये नै ६ जना कायम रहेको बताए ।

जेनजी अभियन्ताहरूले भने विवादित श्रेष्ठलाई कायम राखिएर प्रधानमन्त्रीले सचिवालय कटौती गरेकामा असन्तुष्टि व्यक्त गरेका छन् । ‘जेनजीहरूले जेनजी आन्दोलनको मर्मविपरीत नातावाद र कृपावादलाई प्रोत्साहन दिएको भनेर आदर्श श्रेष्ठलाई बर्खास्त गर्न माग गरेका हौं । तर, उहाँलाई जोगाउनुले प्रधानमन्त्रीकै नैतिकतामा प्रश्न उठेको छ,’ जेनजी अभियन्ता जस्मिन ओझाले भनिन्, ‘भ्रष्टाचारविरुद्धको जेनजी आन्दोलनबाट बनेको यो सरकारलाई असफल हुने छुट छैन । तर, विवादित पात्रहरूलाई संरक्षण गरेर प्रधानमन्त्री नै नातावाद, कृपावादलाई प्रोत्साहित गरिरहनुभएको त छैन भन्ने देखिएको छ ।’ श्रेष्ठलाई तत्काल सचिवालयबाट हटाएर जेनजीको माग सम्बोधन गर्न पनि उनले प्रधानमन्त्री कार्कीलाई सुझाव दिइन् ।

कर्मचारी कटौतीसँगै अब प्रधानमन्त्री कार्कीको सचिवालयमा प्रमुख स्वकीय सचिव, मुख्य सल्लाहकार, जनसम्पर्क सल्लाहकार, प्रेस संयोजक, स्वकीय शाखा अधिकृत (फोटोग्राफर) र जनस्वास्थ्य विज्ञ मात्र रहने छन् । प्रधानमन्त्री तथा मन्त्रिपरिषद्को कार्यालयले बुधबार विज्ञप्ति जारी गर्दै सचिवालयमा हाल रहेका २० जनामध्ये ६ जनामात्रै राखेर अन्य १४ जनालाई हटाउने निर्णय गरेको र सो निर्णय बिहीबारबाट लागू हुने उल्लेख गरेको छ ।

सचिवालयमा अब मुख्य सल्लाहकार अजयभद्र खनाल, जनसम्पर्क सल्लाहकार गोविन्दनारायण तिमिल्सिना, प्रमुख स्वकीय सचिव आदर्शकुमार श्रेष्ठ, प्रेस संयोजक रामबहादुर रावल, स्वकीय शाखा अधिकृत (फोटोग्राफर) केशव थापा र जनस्वास्थ्य विज्ञ (अवैतनिक) डा. मनबहादुर केसी रहनेछन् ।

जेनजी आन्दोलनको प्रतिनिधिका रूपमा सचिवालयमा परेकाहरू पनि कटौती भएका छन् । जेनजी आन्दोलनकी अभियन्ता प्रदीप ज्ञवाली, आकृति घिमिरेलगायतलाई सचिवालयबाट हटाइएको छ ।

नेताले आफ्ना छोराछोरी, नातेदार र नजिकका मान्छेहरूलाई अवसर दिएको भन्दै भएको जेनजी आन्दोलनपछि बनेको सरकारमा प्रधानमन्त्रीकै सचिवालय नातेदारको केन्द्र बनेपछि जेनजीहरूले आक्रोस व्यक्त गरेका थिए । तर, बुधबार प्रधानमन्त्री कार्यालयले जारी विज्ञप्तिमा जेनजीले उठाएका प्रश्नअनुसार सचिवालय कटौती गरेको बताइए पनि उनीहरूले बर्खास्त गर्न माग गरेका श्रेष्ठ जोगाइएका छन् ।

‘नातावाद, कृपावादलाई हाबी गराउन खोज्ने प्रधानमन्त्रीका प्रमुख स्वकीय सचिवजस्ता मानिसहरूको स्वार्थका कारण परिवर्तनका लागि बगेको रगतको अपमान भएको छ,’ जेनजी फ्रन्टकी संयोजक रक्षा बमले सोमबार विज्ञप्ति जारी गर्दै भनेकी थिइन्, ‘श्रेष्ठलाई तत्काल पदमुक्त गरी उनले दिलाएका पारिवारिक नियुक्तिहरू तुरुन्तै खारेज गरियोस् ।’ जेनजी फ्रन्टजस्तै जेनजीका नाममा बनेका दर्जनबढी समूहले श्रेष्ठलाई बर्खास्त गर्न माग गरेका थिए ।

प्रधानमन्त्रीको प्रमुख स्वकीय श्रेष्ठ सर्वोच्च अदालतको सूचना प्रविधि (आइटी) महाशाखामा नायबसुब्बा स्तरको कम्प्युटर अपरेटर पदमा कार्यरत थिए । अदालतमा रहँदै विचौलियाका रूपमा विवादमा तानिएका श्रेष्ठ भदौ २९ गते प्रधानमन्त्री कार्कीका प्रमुख स्वकीय सचिव नियुक्त भएका थिए । संगीता पनि सोही महाशाखामा नासुमा करारमा थिइन् । आईटीको पृष्ठभूमि नभए पनि उनलाई उक्त महाशाखामा नियुक्त गरिएको भनी आलोचना भएको थियो । पूर्वप्रधानन्यायाधीश कल्याण श्रेष्ठ र हालकी प्रधानमन्त्री कार्की प्रधानन्यायाधीश रहेका बेलामा सँगै काम गरेका थिए । त्यतिबेला प्रधानन्यायाधीशले नै पेसी तोक्ने चलन थियो ।

त्यस क्रममा श्रेष्ठलगायत निजी सचिवालयका केही व्यक्तिबाट पेसी सूची प्रकाशन हुनुअघि नै सम्बन्धित मुद्दावालालाई जानकारी दिइने गरेको भन्दै उनीमाथि प्रश्न उठेको थियो । विवादमा तानिएका श्रेष्ठलाई गोपाल पराजुली प्रधानन्यायाधीश नियुक्त भएपछि भने निजी सचिवालयबाट हटाएर नायब सुब्बा स्तरको कम्प्युटर अपरेटरमै सारिएको थियो । एकाएक उनै श्रेष्ठ कार्की प्रधानमन्त्री नियुक्त भएपछि प्रमख स्वकीय सचिव बनाइएपछि उनलाई चिन्नेहरूले आश्चर्य व्यक्त गरेका थिए ।

जेनजीले श्रेष्ठको विवादित विगत र प्रधानमन्त्री कार्यालयमा नातेदार भर्तीको विषयमा प्रश्न उठाएपछि सोमबार प्रधानमन्त्री कार्यालयले श्रेष्ठको बचाउमा विज्ञप्ति जारी गरेको थियो । ‘प्रधानमन्त्री निवासमा रही नजिकबाट सहयोग गर्नुपर्ने र चौबीसै घण्टा सँगै रहेर खट्नुपर्ने भएकाले सुरक्षाका कारण पनि विश्वासिलो, भरपर्दो र रातदिन खटिएर काम गर्न सक्ने व्यक्ति नियुक्त गरिएको हो । कानूनसम्मत नियुक्त गरिएको विषयलाई लिएर प्रश्न उठाई अन्यथा व्याख्या नगर्न अनुरोध छ ,’ सोमबार जारी प्रधानमन्त्री कार्यालयको विज्ञप्तिमा उल्लेख थियो ।