जिल्लाको आदेश उच्च अदालतले उल्ट्यायाे

काठमाडौं । सुन तस्करीको आरोपमा पुर्पक्षमा थुनामा रहेका पूर्वसभामुख कृष्णबहादुर महरा २० लाख धरौटी बुझाएर रिहा भएका छन् । उच्च अदालत पाटनका न्यायाधीशद्वय अर्जुनप्रसाद कोइराला र तेजेन्द्रप्रसाद शर्मा सापकोटाको इजलासले बिहीबार जिल्ला अदालत काठमाडौंको आदेश बदर गर्दै धरौटीमा रिहा गर्न आदेश दिएको हो ।

जिल्लाले गत असोज २९ मा महरालाई पुर्पक्षका लागि थुनामा पठाउने आदेश गरेको थियो । उच्च अदालतले तोकेको २० लाख धरौटी बुझाएर उनी छुटेका हुन् ।

दुबईबाट आएको जहाजमा इलेक्ट्रिक सिग्रेट (भेप) मा लुकाएर ल्याइएको करिब ९ किलो सुन तस्करी प्रकरणमा महराविरुद्ध मुद्दा दायर गरिएको थियो । यस मुद्दामा जिल्लाले थुनामा पठाउन दिएको आदेशअनुसार थुनामा राख्नैपर्ने नदेखिएको कारणसहित उच्चले जिल्लाको आदेश उल्ट्याइदिएको हो । महराउपर जाहेरीमा नाम उल्लेख भएको नदेखिएको, प्रतिवादी बनाइएका सहअभियुक्तहरूले महरालाई पोल नगरेको, चोरी पैठारी भएको भनिएको सुन जफत भएर दसीका रूपमा पेस नभएको, पूरक अभियोगमा नयाँ तथा थप प्रमाण संकलन नभएको र महराको उमेर तथा स्वास्थ्य अवस्थासमेतलाई हेर्दा थुनामा राख्न नपर्ने देखिएको उच्च अदालतको आदेशमा उल्लेख छ ।

सुन तस्करी प्रकरणमा मुछिएका महरालाई नेपाल प्रहरीको केन्द्रीय अनुसन्धान ब्युरो (सीआईबी) ले गत असोज २६ मा पक्राउ गरेको थियो ।