चिनिएका अनुहारलाई पार्टीमा भित्र्याउने लहर

काठमाडौं । फागुन २१ गते प्रतिनिधिसभा निर्वाचनका लागि राजनीतिक दलहरूले दल दर्तासँगै गतिविधि बढाएका छन् । निर्वाचनको मिति नजिकिँदै जाँदा दलहरूले पार्टीभित्र ‘चिनिएका अनुहार’ भित्र्याउने क्रम पनि शुरु भएको छ । भदौ २३ र २४ गतेको जेनजी आन्दोलनपछि राजनीति दलका पुराना अनुहार भन्दा नयाँ अनुहार रुचाइने आँकलनकाबीच दलहरूमा नयाँ अनुहारको खोजी बढेको छ । कलाकार, अभियन्ता, चिनिएका पूर्व प्रहरी अधिकारीहरू विभिन्न राजनीतिक दलमा प्रवेश हुने क्रम बढेको छ । केही नयाँ पार्टीमा आबद्ध भइसकेका छन् भने केही चुनाव लड्ने घोषणा गरिरहेका छन् । केही चिनिएका अनुहार पनि ‘पर्ख र हेर’ को अवस्थामा देखिएका छन् ।

यसबीच राष्ट्रिय स्वतन्त्र पार्टीले नेपाल प्रहरीका पूर्वअतिरिक्त प्रहरी महानिरीक्षक (एआईजी) विश्वराज पोखरेललाई पार्टीमा भित्र्याएको छ । शुक्रबार रास्वपाको पार्टी कार्यालय बनस्थलीमा एक कार्यक्रमका बीच पोखरेल पार्टी प्रवेश गरेका हुन् । तत्कालीन शेरबहादुर देउवा नेतृत्वको सरकारले धीरजप्रताप सिंहलाई आईजीपी बनाएपछि असन्तुष्ट बनेका पोखरेलले राजीनामा दिएका थिए । पोखरेलको पार्टी प्रवेशलगत्तै केन्द्रीय अनुशासन आयोगको वरिष्ठ सल्लाहकारको जिम्मेवारी दिने निर्णय गरेको छ ।

यस्तै, मुस्कान खातुन नेपाली कम्युनिस्ट पार्टी (नेकपा) प्रवेश गरेकी छन् । पर्साकी खातुन केही वर्षअघि एसिड आक्रमणमा परेकी थिइन् । त्यसयता उनी एसिड आक्रमणविरोधी अभियन्ताका रुपमा सक्रिय थिइन् । उनलाई बिहीबार राष्ट्रिय सभागृहमा आयोजित कार्यक्रममा नेकपाका संयोजक पुष्पकमल दाहाल र सहसंयोजक माधवकुमार नेपालले पार्टीमा प्रवेश गराए । खातुनलाई नेकपाले केन्द्रीय सदस्य बनाउने घोषणा गरेको छ ।

यस्तै, रुक्शना कपाली प्रगतिशील लोकतान्त्रिक पार्टी (प्रलोपा) मा प्रवेश गरेकी छन् । उनी नेपाल भाषा र क्वेयर (विविध यौनिक तथा लैंगिक पहिचान) युवा अभियन्ता हुन् । २०८० सालमा बीबीसीको १०० प्रभावशाली महिलाको सूचीमा नेपालबाट रुक्साना कपाली परेपछि चर्चामा आएकी थिइन् । यो पूर्वप्रधानमन्त्री बाबुराम भट्टराई, जनार्दन शर्मालगायत अभिभावकीय भूमिकामा रहने गरी प्रलोपा गठन भएको हो ।

यस्तै, अभिनेत्री रीमा विश्वकर्मालाई उज्यालो नेपाल पार्टीले केन्द्रीय सदस्य बनाएको छ भने नायिका निशा अधिकारी गतिशील लोकतान्त्रिक पार्टीमा केन्द्रीय सदस्य बनेकी छन् । अधिकारीले आफू समानुपातिकतर्फ सांसद बन्ने गरी राजनीतिमा आउन नचाहेको भन्दै प्रत्यक्ष चुनाव नै लड्ने बताएकी छन् ।

राजनीतिक दलसँग नजिक रहेका चर्चित अनुहारहरू पनि चुनाव लड्ने तयारीमा छन् । ‘कालो पोथी’ र ‘शाम्बाला’ जस्ता चर्चित चलचित्रका निर्देशक मीनबहादुर भाम अहिले कांग्रेसमा आगामी चुनाव लड्ने तयारीमा छन् । ‘निर्वाचनमा काठमाडौं ३ बाट लड्ने सोचमा छु ,’ भामले आफ्नो सोच सुनाउँदै भने ।

उसो त यसअघि चर्चित नायिका रेखा थापा राष्ट्रिय प्रजातन्त्र पार्टी र कोमल ओली नेकपा एमालेमा सक्रिय छन् । थापा सुनसरी र वली दाङबाट निर्वाचन लडे पनि पराजित भएका थिए । निर्वाचन नजिकिएसँगै पुराना राजनीतिक दल र नयाँ खुलेका दलहरूमा चिनिएका अनुहार भित्रिने क्रम अझै बढ्ने चर्चा राजनीतिक वृत्तमा छ ।