कूलमानको उपस्थितिमा उज्यालो नेपाल पार्टीे घोषणासभा मंसिर १७ मा

काठमाडौं । उज्यालो नेपाल पार्टीले ऊर्जा, शहरी तथा भौतिक मन्त्री कुलमान घिसिङको उपस्थितिमा पार्टी घोषणासभा गर्ने भएको छ । शुक्रबार काठमाडौंमा पत्रकार सम्मेलन गर्दै उज्यालो नेपाल पार्टीले मंसिर १७ गते बुधवार घोषणासभा आयोजना गर्ने जानकारी गराएको हो । काठमाडौंको प्रज्ञा भवनमा आयोजना गरिने सो सभामा घिसिङ प्रमुख वक्ताका रुपमा सहभागी हुने बताइएको छ ।

घोषणा सभामा पार्टीको दृष्टि, मूल ध्येय र विस्तृत घोषणापत्र २०८२ औपचारिक रुपमा सार्वजनिक गरिने पनि प्रवक्ता राजु थापाले जानकारी दिए । सो अवसरमा उज्यालो नेपाल पार्टीको दीर्घकालीन दृष्टि, मूल ध्येय र विस्तृत घोषणापत्र २०८२ औपचारिक रुपमा सार्वजनिक गरिनेछ ।

उज्यालो नेपाल पार्टी निर्वाचन आयोगमा दर्ता भइसकेको छ । पूर्व ऊर्जासचिव अनुपकुमार उपाध्यायको अध्यक्षतामा पार्टी निर्वाचन आयोगमा दर्ता भइसकेको छ । अहिले घिसिङ अन्तरिम चुनावी सरकारको मन्त्री रहेकाले उनले चुनाव अगाडि सरकार छाड्ने र पार्टीको नेतृत्व गर्नेछन् । चुनावी सरकारको मन्त्री पार्टीमा प्रत्यक्ष जोडिँदा निर्वाचनको निष्पक्षतामा प्रश्न उठ्ने भन्दै प्रधानमन्त्री सुशीला कार्कीले आफू आगामी निर्वाचन पनि नलड्ने बताइसकेकी छन् । तर, कार्की नेतृत्वकै सरकारमा मन्त्री घिसिङले भने फागुन २१ गतेको चुनाव लड्ने गृहकार्य गर्दै दल दर्ता गराएका छन् । घिसिङ अहिले उज्यालो नेपाल पार्टीको केन्द्रीय समिति बैठक र कार्यक्रमहरूमा समेत सहभागी हुन थालेका छन् ।