एनसेलले सार्वजनिक गर्‍यो ‘एनपीएल प्ले प्याक’, डिशहोममा खेल हेर्न सकिने

काठमाडौं । एनसेलले नेपाल प्रिमियर लिग (एनपीएल) दोस्रो संस्करणलाई लक्षित गर्दै ‘एनपीएल प्ले प्याक’ सार्वजनिक गरेको छ । डिशहोमसँग सहकार्यमा ल्याइएको यो प्याकमार्फत ग्राहकले डिशहोम गो एपमा एनपीएलका खेलहरू प्रत्यक्ष हेर्न सक्नेछन् ।

एनसेलका अनुसार क्रिकेटका खेलहरू सहज र किफायती रूपमा हेर्न सकून् भन्ने उद्देश्यले यो प्याक सञ्चालनमा ल्याइएको हो । करसहित २९९ रुपैयाँमा उपलब्ध यो प्याकसँगै ग्राहकले २८ दिनका लागि १ जीबी डेटा बन्डल पाउनेछन् । उक्त प्याक लिएपछि डिशहोम गो एपमा लगइन गर्न आवश्यक विवरण एसएमएसमार्फत उपलब्ध गराइने एनसेलले जनाएको छ ।

ग्राहकले एनसेल एप तथा ८१२३३ डायल गरी वा नजिकका एनसेल खुद्रा विक्रेतामार्फत प्याक खरिद गर्न सक्नेछन् । एनसेलका चिफ कन्जुमर बिजनेस अफिसर उपङ्ग दत्तले क्रिकेटका खेलहरूलाई जुनसुकै स्थानबाट मोबाइलमा निर्बाध रूपमा हेर्न मिल्ने सुविधा गर्न पाएकोमा खुशी व्यक्त गरेका छन् । उनले भने, ‘डिशहोमसँगको सहकार्यले ग्राहकलाई एनपीएलका खेलहरूको रोमाञ्चकता अझ नजिकबाट अनुभूति गराउनेछ ।’

एनपीएलमा एनसेल ‘पावर्ड वाइ’ पार्टनरको रूपमा आवद्ध छ । ‘युनाइटेड वाइ क्रिकेट, कनेक्टेड वाइ एनसेल’ नाराका साथ यस वर्षको सहकार्यलाई कम्पनीले अघि बढाएको छ । साथै, खेलप्रेमीका लागि यसको ‘एनपीएल फ्यान प्याक’ पनि कम्पनीले अगावै सार्वजनिक गरिसकेको छ ।

यस्तै, एनसेल फाउन्डेसनले व्यवसायिक सामाजिक जिम्मेवारीअन्तर्गत गत वर्षझैं यस वर्ष पनि ‘फोर फर एजुकेशन’ कार्यक्रम निरन्तरता दिएको छ, जसअनुसार एनपीएलका खेलमा प्रहार हुने प्रत्येक चौकामा ग्रामीण तथा दुर्गम क्षेत्रका सामुदायिक विद्यालयका विद्यार्थीलाई चारवटा शैक्षिक सामग्री प्रदान गरिनेछ ।