कांग्रेसलाई महाधिवेशनकै उल्झन, फेरि स¥यो बैठक

संवाददाता
काठमाडौ, मंसिर १३ 
कांग्रेसका नेताहरूबीच १५औं महाधिवेशनबारे सहमति नजुट्दा आइतबारका लागि तय भएको केन्द्रीय समिति बैठकको मिति फेरि सरेको छ । मुख्यसचिव कृष्ण पौडेलले शनिबार बेलुका विज्ञप्ति जारी गर्दै बैठक सोमबार बस्नेगरी सारिएको जनाएका छन् । गत असोज २८ बाट सुरु भएको कांग्रेस बैठक कुनै निष्कर्षमा पुग्न सकेको छैन ।

सभापति शेरबहादुर देउवा आफैंले महाधिवेशनको मितिबारे विभाजित दुवै समूहसँग शुक्रबार र शनिबार अलग–अलग छलफल गरेर सहमतिका लागि प्रयास गरे । तर, देउवाको प्रयासले पनि निकास निकाल्न नसक्दा केन्द्रीय समिति बैठक मिति तोक्ने र सर्ने हुँदै आएको छ । कार्यवाहक सभापति पूर्णबहादुर खड्का र नेता रमेश लेखकले पनि सहमति जुटाउनका लागि नेताहरूसँग अलग–अलग भेटघाट र छलफल गरिररहेका छन् । 

बैठक सरेको सरेकै गरेपछि आलोचना भएपछि कार्यवाहक सभापति खड्काले ‘सर्वसम्मत निर्णय गर्ने अवस्था नबनेसम्म बैठक सारिरहन्छु’ भन्दै शुक्रबार बेलुका प्रष्टीकरण दिएका थिए । मंसिर ६ गते प्रतिनिधिसभा निर्वाचनमा भाग लिने निर्णय गरेको कांग्रेस केन्द्रीय समिति बैठक मंसिर ११ का लागि तोकिएको थियो । चुनावअघि नै पार्टीको १५औं महाधिवेशन गर्नेबारे उक्त बैठकबाट टुंगो लाग्ने दाबी गरिएकोमा त्यसयता लगातार तीनपटक केन्द्रीय समिति बैठक सारिएको छ । कांग्रेसभित्र नियमित वा विशेष महाधिवेशन ? चुनाव अघि कि पछि ? भन्ने विवाद नसुल्झँदा लगातार बैठक सर्दै आएको छ ।

पार्टीमा नियमित वा विशेष महाधिवेशनका लागि चर्को माग छ । दुई महामन्त्रीहरू सुधारवादी धारका पक्षमा छन् भने संस्थापन पक्षधर नेताहरू प्रतिनिधि सभा निर्वाचनअघि पार्टीको महाधिवेशन गर्न हुँदैन भन्ने पक्षमा छन् । लगातार लम्बिएको पार्टी केन्द्रीय कार्य समिति बैठक महाधिवेशनको विषयमा नेताहरू प्रष्ट हुन नसक्दा सरिरहेको हो । 

पार्टीले निर्वाचनमा जाने निर्णय गरेर दल दर्ता गराइसकेको छ । संस्थापन पक्षधर नेताहरू सबै शक्ति निर्वाचनमा लाग्नुपर्ने बेलामा पार्टीको महाधिवेशन गर्न उपयुक्त नहुने बताइरहेका छन् । महामन्त्रीहरू भने जेनजी आन्दोलनपछि मुलुकको परिवर्तित परिस्थितिमा पार्टीले पुरानै एजेण्डा लिएर जनतामाझ जान गाह्रो हुने भनिरहेका छन् । 

कार्यवाहक सभापति पाएका पूर्णबहादुर खड्काले केन्द्रीय कार्य समिति बैठकलाई निष्कर्षमा पु¥याउन नसकेपछि पार्टी सभापति शेरबहादुर देउवा पुनः सक्रिय भएका छन् । उनले नेताका पक्ष–विपक्षलाई सुनिरहेका छन् । केन्द्रीय कार्यसमितिका अधिकांश सदस्य आफ्ना पक्षधर भएकाले देउवा पनि महाधिवेशन गर्ने÷नगर्ने निषयमा राय दिन हतारिएका छैनन् । 
  
देउवा सकारात्मक, निधि र सिटौला मानेनन्
सभापति देउवाको महाराजगंजस्थित निवासमा शनिबार दिउँसो सहमतिका लागि भन्दै नेताहरूको बैठक भएको छ । बैठकमा अहिले विशेष महाधिवेशन रोक्ने र निर्वाचनपछि विशेष महाधिवेशन गर्ने सम्भावनाबारे केन्द्रित भए पनि कुनै निष्कर्ष निस्किएन । स्रोतका अनुसार बैठकमा सभापति देउवाले विशेष महाधिवेशन गर्न नहुने र मध्यमार्ग निकाल्नुपर्नेमा जोड दिएका थिए । ‘मंसिरमा नसके पुस वा माघसम्म गरेर भए पनि नियमित महाधिवेशनको तालिका ल्याएर अघि बढौं,’ सभापति देउवाको भनाइ थियो । 

तर, निर्वाचनअघि पार्टीको महाधिवेशन गर्न नहुनेमा पूर्वपदाधिकारी विमलेन्द्र निधि र कृष्ण सिटौलाले अडान राखे । ‘हामीले चुनावलाई प्राथमिकता दिनका लागि अहिले महाधिवेशन गर्न हुँदैन भनेका हौं । हाम्रो अरू कुनै स्वार्थ छैन,’ पूर्वमहामन्त्री निधिले भने । पूर्वमहामन्त्री सिटौला पनि चुनावअघि महाधिवेशन गर्न नहुने अडानमा छन् । 

शनिबारको बैठकमा महामन्त्री गगन थापासहित विशेष महाधिवेशन पक्षधरहरूलाई आफ्नो प्रस्ताव फिर्ता लिएर नियमित महाधिवेशनतर्फ अघि बढ्न आग्रह गरेपछि त्यसको जिम्मा आफूले लिन नसक्ने जवाफ दिएका थिए । त्यसपछि बैठक कुनै निष्कर्षमा नपुगी सकिएको थियो । महामन्त्री थापा र विश्वप्रकाश शर्मा पक्षधर अब नियमित महाधिवेशन चुनावअघि सम्भव नभएको भन्दै विशेष महाधिवेशनको विकल्प नभएको बताइरहेका छन् भने संस्थापनसमूहका नेताहरू चुनावअघि महाधिवेशन गर्न नहुने अडानमा छन् ।