प्रधानमन्त्री निर्वाचन संवादमा सक्रिय

काठमाडौं (संवाददाता)– निर्वाचनको मिति नजिकिँदै जाँदा प्रधानमन्त्री सुशीला कार्की राजनीतिक संवाद, समन्वय र विश्वास निर्माणका गतिविधिमा थप सक्रिय बनेकी छन् । जिम्मेवारीअनुसार निर्वाचन सफलतापूर्वक सम्पन्न गराउनु सरकारको प्रमुख कर्तव्य भए पनि उनले  पछिल्ला दिनमा विभिन्न राजनीतिक दल, आन्दोलनरत समूह र सरोकारवाला पक्षहरूसँग निरन्तर भेटघाट गर्दै आएकी हुन् ।

निर्वाचन र आफ्नो सरकारको प्रखर विरोधीका रुपमा देखिएको एमालेका नेताहरुसँग उनले गत बिहीबार विस्तृत छलफल गरेकी थिइन । एमालेले निर्वाचनमा सहभागिता सुनिश्चित गर्न निर्वाचन आयोगमा दल दर्ता गराएको छ, सँगै प्रतिनिधि सभा पुनःस्थापनाको मागसहित सर्वोच्च अदालतमा रिट दर्ता गराएको छ ।

त्यसयता शुक्रबार जेनजी आन्दोलनका प्रतिनिधिसँग भेट्दै उनीहरूले उठाउँदै आएका माग र असन्तुष्टिहरू बुझ्ने प्रयास गरिन् । शनिबार राप्रपा र नेपाल परिवार दलका शीर्ष नेतासँग क्रमिक भेटवार्ता गर्दै उनले आगामी निर्वाचन र समसामयिक राजनीतिक प्रश्नहरूबारे प्रत्यक्ष संवाद गरेकी छन् । 

प्रधानमन्त्री कार्कीले भेटमा मुलुक अब झगडा, विभाजन र अनिश्चिततामा फर्कनु नहुने भनाइ राखिन् । उपलब्धि जोगाउँदै अघि बढ्नुपर्ने उल्लेख गरिन् । उनले विगतका किचलो र अविश्वासले देशले ठूलो क्षति बेहोरेको उल्लेख गर्दै अहिलेको संवेदनशील मोडमा सबै दलले सहकार्य र संयम देखाउनुपर्ने बताइन् । ‘विमति छन् भने जनतामै गएर म्यान्डेट लिऔँ । जनताको निर्णयले नै राजनीतिक दिशानिर्देश दिन्छ,’ राप्रपाका नेताहरुसँगको भेटमा उनको भनाइ थियो । लोकतान्त्रिक पद्धति सुदृढ हुन जनताको अनुमोदन नै प्रमुख माध्यम हुने उनको धारणा छ ।

प्रधानमन्त्रीले दण्डहीनता समाप्ति र न्याय कार्यान्वयनमा कुनै सम्झौता नहुने पुनः दोहो¥याइन् । उनले हालैका संवेदनशील घटनामा निर्दोष नागरिक, विशेष गरी बालबालिकाको मृत्युबारे बनेको छानबिन प्रतिवेदन जस्ताको तस्तै लागू गर्ने प्रतिज्ञा गरिन् । उनले भनिन्, ‘मुलुकको वातावरण बिगार्न लागेका तत्वलाई राज्यले उपेक्षा गर्दैन । दण्डहीनतालाई प्रश्रय नदिने नीति दृढ रूपमा लागू हुन्छ ।’

राप्रपा अध्यक्ष राजेन्द्र लिङ्देनले सरकार केवल निर्वाचनलाई प्राथमिकता दिएर अन्य गम्भीर राष्ट्रिय समस्याबाट पन्छिन नहुने टिप्पणी गरेका छन् । उनले राजसंस्थासहित सर्वपक्षीय संवाद, विदेशमा रहेका नेपालीका लागि मताधिकार व्यवस्था, युवा आन्दोलनका सहभागीमाथिको दमन रोक्नुपर्ने, र सरकारसँग भेट गर्न चाहने समूहलाई उपेक्षा नगर्नुपर्ने आग्रह राखेको सञ्चारकर्मीलाई बताए । राप्रापाको टोलीले प्रधानमन्त्रीसँग भेट गरी ज्ञापनपत्र बुझाइएको छ । टोलीमा नेताहरु विक्रम पाण्डे, रोशन कार्की, रवीन्द्र मिश्र, उपाध्यक्ष हेमजंग गुरुङ,  धवलशमशेर राणा, कुन्ती शाही, राजेन्द्र गुरुङ, शरदराज पाठकलगायत सहभागी थिए ।

परिवार दलका अध्यक्ष एकनाथ ढकालले प्रधानमन्त्रीको नेतृत्वमा चुनावी वातावरण सकारात्मक रूपमा बन्दै गएको मूल्यांकन गर्दै सबै दलले समान जिम्मेवारीसहित चुनावी प्रक्रियामा सहभागी हुनुपर्ने बताए ।