निर्वाचनमा जान सबै तयार तर...

काठमाडौँ – प्रधानमन्त्री सुशीला कार्कीले डाकेको सर्वदलीय पार्टीहरूको भेलामा पुगेका नेताहरूले निर्वाचनमा जान आफ्नो पार्टी तयार रहेको बताए पनि बाहिर निस्केर ‘तर’ थप्ने गरेका छन् ।

बैठकमा भाग लिएकी नेपाली कांग्रेसकी नेत्री पुष्पा भुसालले आफ्नो पार्टी आगामी फागुन २१ गते हुने प्रतिनिधिसभाको निर्वाचनमा भाग लिन सम्पूर्ण रुपमा तयार रहेको बताएकी छन् । उनले निर्वाचनलाई सफल बनाउन आफ्नो पार्टीले आवश्यक सहयोग गर्ने, निर्वाचनमा सहभागी हुन कांग्रेस तयार रहेको तर त्यो वातावरण बनाउने जिम्मेवारी सरकारको भनी आफ्ना धारणा बैठकमा राखेको उनले बताइन् ।

सोही बैठकमा सहभागी नेपाली कम्युनिष्ट पार्टी (नेकपा) का नेता प्रकाश ज्वालाले सरकारको काम निर्वाचन गराउने भएकाले सरकारको अर्जुन दृष्टि निर्वाचन हुनुपर्ने बताए । उनले पनि तर थप्दै चुनावको वातावरणको निम्ति शान्ति सुरक्षा अझै सुदृढ गर्नुपर्ने बताए ।