अनुभवी बैंकर मानन्धरको निधन

काठमाडौं – नेपालको बैंकिङ क्षेत्रका एक अनुभवी व्यक्तित्व तथा प्राइम कमर्सियल बैंकका संस्थापक प्रमुख कार्यकारी अधिकृत नारायणदास मानन्धरको ८२ वर्षको उमेरमा आइतबार निधन भएको छ । लामो समयदेखि अस्वस्थ उनी उपचाररत थिए ।

मानन्धर नेपाली बैंकिङ इतिहासमा एक दूरदर्शी नेताको रूपमा चिनिन्छन् । उनले सन् २००७ मा स्थापित भएको नेपालको २१औं वाणिज्य बैंक प्राइम कमर्सियल बैंकलाई नेतृत्व गरेका थिए । उनको अगुवाइमा छोटो समयमै प्राइम बैंक नयाँ उचाइमा पुगेको हो । उनी प्राइममा करिब १६ वर्ष सीइओ पदमा थिए । राष्ट्र बैंकले तोकेको उमेर हदका कारण उनले २०८० साउनमा बैंकबाट बिदा लिएका थिए ।

बैंकिङ क्षेत्रमा उहाँको अनुभवको दायरा प्राइम कमर्सियल बैंकमा मात्र सीमित थिएन । सन् १९६९ मा भूमि सुधार तथा बचत निगमको शाखा प्रमुखको रुपमा सेवा प्रवेश गरेका मानन्धरले राष्ट्रिय धानचामल कारखानाको प्रमुख कार्यकारी, कृषि विकास बैंकको प्रथम श्रेणीको विभागीय प्रमुख र पछि नायब महाप्रबन्धक, धानचामल निर्यात कम्पनीको महाप्रबन्धक भएर काम गरेका थिए । संयुक्त राष्ट्रसंघीय खाद्य तथा कृषि संगठनमा परामर्शदाता, राष्ट्रिय वाणिज्य बैंकको कार्यकारी सञ्चालक, लुम्बिनी बैंकको प्रमुख कार्यकारी अधिकृत, विश्व बैंकको जलविद्युत विकास कोष र नेपाल बंगलादेश बैंकमा काम गरेका थिए । उनले काम गरेका वित्तीय संस्थामा अन्तिम प्राइम कमर्सियल बैंक रह्यो । प्राइम छाडेपछि उनले बैंकिङ क्षेत्रबाट अवकाश लिएका थिए । उनको आइतबार नै शोभा भगवतीमा अन्त्येष्टि गरिएको छ । उनको निधनप्रति प्राइम बैंकले दुःख व्यक्त गरेको छ । मुलुकको आर्थिक तथा बैंकिङ क्षेत्रले महत्वपूर्ण व्यक्ति गुमाएको सीइओ संजीव मानन्धरद्वारा जारी विज्ञप्तिमा छ ।