इन्डोनेसियाको आगलागीमा २२ जनाको मृत्यु

जकार्ता । इन्डोनेसियाको राजधानी जकार्तामा मंगलबार सात तले कार्यालय भवनमा लागेको आगलागीमा कम्तीमा २२ जनाको मृत्यु भएको छ । प्रहरीका अनुसार आगो पहिलो तलामा विस्फोट भएको ड्रोनको ब्याट्रीबाट सल्किएको हुनसक्ने प्रारम्भिक अनुमान गरिएको छ ।

तल्लो तलामा सल्किएको आगो क्रमिक रूपमा माथिल्ला तलाहरूमा फैलिँदै जाँदा स्थिति भयाभव बन्न पुगेको जनाइएको छ । सेन्ट्रल जकार्ताका प्रहरी प्रमुख सुसात्यो पुर्नोमो कोन्द्रोले आगलागीका खास कारणमाथि फोरेन्सिक प्रयोगशालामा अनुसन्धान भइरहेको जनाएको छ । ‘हामी घटनाको अनुसन्धानमा प्रतिबद्ध छौं,’ उनले भनेका छन् । एक प्रत्यक्षदर्शीका अनुसार खाना खाने समयमा आगो सल्किएको भएको थियो र दमकल टोली घटनास्थलमा आइपुग्दा आगो दनदनी दन्किसकेको थियो । ‘सबै ढोकाहरू बन्द थिए,’ स्थानीय ५३ वर्षीया नुरहायतीले भने, ‘आगो चाँडै नै ह्वारह्वारर्ती सल्कियो र अवस्था भयावह बन्यो ।’

प्रहरीले आगलागीमा हालसम्म २२ जनाको मृत्यु भइसकेको पुष्टि गरेको छ । आगलागीमा परेर ज्यान गुमाउनेहरूमा महिलाको संख्या १५ रहेको पनि प्रहरीले जनाएको छ । ‘मृत्यु हेनेमा एक जना महिला गर्भवती थिइन्,’ एक प्रत्यक्षदर्शीले भने । जकार्ता दमकल विभागले कम्तीमा सय दमकलकर्मी र २९ वटा दमकल परिचालन गरेर आगो नियन्त्रणमा लिएको थियो । उद्धारकर्ममा सलंग्न एक प्रहरी कमाण्डर पनि घाइते भएका छन् । ‘भवन पूर्ण रूपमा खाली भएपछि हामी फेरि खोजी गर्नेछौं,’ उनले भने ।

घटनास्थलको अवस्था हेर्दा अधिकांश मृतक निस्सासिएका कारण मृत्युवरण गर्न पुगेको देखिन्छ । आगलागीमा क्षतिग्रस्त भवनको बाहिरी भाग जलेर कालै भएको छ र भने केही झ्यालका सिसा फुटेका छन् । आगलागी भएको सो भवनलाई कृषि ड्रोन सेवा कम्पनीले प्रयोग गर्दै आएको थियो । प्रहरीले घटनाका सत्यतथ्य पहिल्याउन प्रत्यक्षदर्शी, स्थानीय व्यवसायी र भवनका स्वामित्व लिएका व्यक्तिहरूसँगको सोधपुछलाई तीव्र बनाएको छ । अनुसन्धान मुख्यतः आगलागी लापरबाहीका कारण भएको हो वा अन्य कुनै कारणले भएको हो भन्ने पत्ता लगाउनमा केन्द्रित रहेको अधिकारीहरूले बताएका छन् ।