त्रस्त सहरको एउटा दिन

कंगोको दक्षिण किभु प्रान्तको उभिरा सहरमा दिनचर्या सामान्यतर्फ फर्किँदै। पसल सावधानीपूर्वक खुल्दैछन्, सवारी फाट्टफुट्ट सडकमा देखिन सुरु भएका छन्। डेमोक्रेटिक रिपब्लिक अफ कंगोमा राजनीतिक तनाव र सुरक्षा संकट छ । पूर्वी प्रान्तहरूमा एम–२३ विद्रोही समूह र सरकारका बीच संघर्ष जारी छ, सयौं मारिएका छन्, हजारौं नागरिक विस्थापित भएका छन्। मानवीय संकट उत्कर्षमा छ । विद्रोही समूहले गोमाजस्ता प्रमुख सहरहरूमा कब्जा जमाइरहेको र यसले आर्थिक गतिविधि र बजारमा ठूलो असर पुर्‍याएको छ । शान्ति प्रयासहरू भइरहे पनि विवाद निरुपण भइसकेको छैन ।

लेक ट्याङान्या ताल किनारमा अवस्थित उभिरा सहरलाई विद्रोहीले कब्जा गरेका थिए । यो ताल अफ्रिकाका सबैभन्दा ठूलो र गहिरो जलाशयमध्ये एक हो, जसले कंगो, तान्जानिया, बुरुन्डी र जाम्बियालाई जोड्छ । यही कारण उभिराले जलमार्ग नियन्त्रण र क्षेत्रीय आवागमनमा निर्णायक भूमिका खेल्छ । यहाँबाट बुरुन्डीको बुजुम्बुरा र तान्जानियाको किगोमासँग नजिक छ । खाद्यान्न, इन्धन, माछा, उपभोग्य सामानको औपचारिक र अनौपचारिक व्यापार चल्छ । पूर्वी कंगोका लागि यो आयात–निर्यातको ढोका जस्तै हो । पूर्वी कंगोमा विद्रोही गतिविधि भइरहँदा उभिरा नियन्त्रणमा हुनु भनेको ताल मार्ग, सीमाना र आपूर्ति लाइन नियन्त्रणमा हुनु हो। त्यसैले यो सहर सुरक्षा रणनीतिमा प्रमुख लक्ष्य बन्छ । कंगोमा अर्थतन्त्र खनिजमा आधारित छ, केही वृद्धि देखाए पनि सुरक्षा खर्च र विद्रोहको कारण बजेटमा दबाब छ । तस्बिर : जानेम नेती जैदी/सिन्ह्वा