संसद् पुनःस्थापनाको रिटमा कारण देखाउ आदेश

काठमाडौं — संसद् पुनःस्थापना माग गर्दै कांग्रेसका निर्वतमान सांसदद्वारा दायर रिटमा सर्वोच्च अदालतको संवैधानिक इजलासले बुधबार कारण देखाऊ आदेश जारी गरेको छ । अन्तरिम आदेश जारी गर्न अस्वीकार गर्दै इजलासले विपक्षीहरूसँग लिखित जवाफ माग गर्ने आदेशसमेत गरेको छ ।

विघटित प्रतिनिधि सभामा कांग्रेसका प्रमुख सचेतक श्यामकुमार घिमिरेलगायतका आठ सांसदले रिट दायर गरेका हुन् । रिटमा प्रतिनिधिसभा विघटन असंवैधानिक भएको जिकिर गर्दै अन्तरिम आदेशको माग थियो ।

सर्वोच्चले विपक्षीसँग प्रतिनिधि सभा विघटनको कारण माग गरेको छ । रिटमा राष्ट्रपतिको कार्यालय, प्रधानमन्त्री सुशीला कार्की, निर्वाचन आयोग, प्रधानमन्त्री तथा मन्त्रिपरिषद् को कार्यालय र सभामुखलाई विपक्षी बनाइएको छ । प्रधानन्यायाधीश प्रकाशमान सिंह राउत, न्यायाधीशहरू सपना प्रधान मल्ल, कुमार रेग्मी, मनोजकुमार शर्मा र नहकुल सुवेदीको संवैधानिक इजलासमा रिटको सुनुवाइ भएको हो ।

एमालेले पनि प्रतिनिधि सभा विघटनविरुद्ध रिट दायर गरेको छ । अहिलेसम्म यस्ता रिट २० वटा परेका छन्, सर्वोच्चले सबैमा कारण देखाऊ आदेश मात्रै जारी गरेको छ ।