नेपाल–चीन मैत्री ७० वर्षमा

नेपाल–चीन मैत्रीका गौरवमय ७० वर्ष पूरा भएको अवसरमा रे मिडिया ग्रुपले राजधानीमा ‘अजम्बरी साइनो’ स्मारिका विमोचन गर्‍यो । स्मारिकामा ३४ जना विज्ञका रचनाहरू समाविष्ट गरिएको रे टेलिभिजनका समाचार निर्देशक तथा स्मारिकाका प्रधानसम्पादक व्याकुल पाठकले बताए ।

कार्यक्रममा रे मिडिया ग्रुपका अध्यक्ष प्रकाश बाबु पौडेलले नेपाल र चीनको अद्भुत सम्बन्धका बारेमा विस्तारमा जानकारी दिँदै चीनले नेपालका विविध क्षेत्रमा सहयोग र सहकार्यको उम्दा उदाहरण पस्किएको बताए ।

कार्यक्रममा नेपाल चीन फ्रेन्डसीप युथ एसोसिएसनका अध्यक्ष विष्णुप्रसाद सापकोटाले युवा मैत्री उद्यमशीलतामा चीनसँग नेपालले सहकार्य गर्दै फाइदाहरू लिन सक्नुपर्ने बताए । त्यस्तै चीन अध्ययन केन्द्रका महासचिव डा. उपेन्द्र गौतमले चीनको विषद् विकासका बारेमा जानकारी दिएका थिए भने चीनका लागि भूतपूर्व नेपाली राजदूत लीलामणि पौडेलले विशाल चीनको सम्भावनाका बारेमा बताएका थिए ।

रे टेलिभिजनले चीनको सीजीटीएन नेपाली सेवासँग मिलेर समाचार, वृत्तचित्र तथा टेलिशृंखलाहरू निर्माण गरिरहेको सो अवसरमा जानकारी दिइयो । कार्यक्रममा ‘सिनजियाङमा भेटौंला’ शृंखलाका केही दृश्यसमेत प्रसारण गरिएको थियो भने नेपाल–चीन सम्बन्धको छोटो डकुमेन्ट्रीसमेत प्रदर्शन गरिएको थियो ।