देउवा–ओली अर्थपूर्ण भेट

काठमाडौं – जेनजी विद्रोहबाट सत्ताच्युत भएपछिको फरक परिस्थितिमा कांग्रेस–एमालेको शीर्ष नेतृत्वबीच सोमबार दोस्रो भेट भएको छ । एमालेका अध्यक्ष केपी शर्मा ओलीले महाराजगञ्जस्थित निवासमै पुगेर कांग्रेस सभापति शेरबहादुर देउवालाई भेटेका हुन् ।

पार्टीको एघारौं महाधिवेशनले तेस्रो कार्यकालका लागि नेतृत्वमा निर्वाचित भएका ओलीको आफ्ना ‘खास रणनीतिकार’ मानिने महासचिव शंकर पोखरेललाई पनि साथै लिएर देउवालाई भेटेका हुन् ।

भेटका क्रममा देउवाले एमाले अध्यक्षमा निर्वाचित भएकोमा ओलीलाई बधाई दिएको र दुई नेताले समसामयिक विषयमा छलफल गरेको देउवाको सचिवालयले जनाएको छ ।

भदौ २४ को जेनजी विद्रोपछि देउवा र ओलीबिच सोमबार दोस्रोपटक भेट भएको हो । यसअघि गत मंसिर १९ मा ओली पत्नी राधिका शाक्यसहित देउवालाई भेट्न पुगेका थिए । संसद पुनःस्थापनाका लागि देउवाकै सहमतिमा कांग्रेसका ६५ सांसदले पूरक निवेदन लिएर सर्वोच्च जाने तयारीका बीच भएको भेटलाई अर्थपूर्ण ठानिएको छ । एमालेले संसद् पुनःस्थापनाका लागि संस्थागत रुपमै अघि बढेको छ । कांग्रेसभित्र संसद् पुनःस्थापनाको मु्द्दामा एमालेले देउवाको साथ खोजेको छ ।

तत्कालीन प्रधानमन्त्री ओलीले भदौ २३ र २४ गतेको घटना छानबिन गर्न गठित जाँचबुझ आयोगमा बयान नदिने अडान लिएका छन् । पार्टीमा पुनः अध्यक्ष निर्वाचित भएपछि ओली सरकारविरुद्ध कडा रुपमा प्रस्तुत भइरहेका छन् भने सिंगापुरबाट फर्केपछि पार्टीमा निष्क्रिय भनिएपनि देउवा सक्रिय बनिरहेका छन् । अघिल्लो भेटपछि ओलीले कांग्रेसका सभापति देउवासँग महŒवपूर्ण संवाद भएको र त्यसको परिणाम क्रमशः आउने बताएका थिए । फागुन २१ को चुनावमा जाने निर्णय गरेको कांग्रेसको देउवासहितको ठूलो हिस्सा अहिले संसद् पुनःस्थापनाको पक्षमा देखिनुलाई ओली– देउवा भेटकै परिणाम ठानिएको छ ।