‘दल निर्वाचनमा प्रतिबद्ध, सरकार तयार’

काठमाडौं – सरकारका मन्त्रिहरूले मुलुकका प्रमुख राजनीतिक दलको कार्यालयमा पुगेर संवाद गरी उनीहरूले उठाएका विषय सरकारसमक्ष पुर्‍याउने प्रतिबद्धता गरेका छन् ।

गत भदौमा भएको जेनजी आन्दोलनका क्रममा क्षतिग्रस्त दलका कार्यालय अवलोकन गर्ने क्रममा कानून, न्याय तथा संसदीय मामिलामन्त्री अनिलकुमार सिन्हा र सञ्चार तथा सूचना प्रविधिमन्त्री जगदीश खरेलले प्रमुख दलका मागका विषयमा सरकार गम्भीर रहेको बताए ।

दुवै मन्त्री मंगलबार सानेपास्थित कांग्रेस, ललितपुरको च्यासलमा रहेको एमाले र पेरिसडाँडास्थित नेपाली कम्युनिष्ट पार्टीको कार्यालय पुगेका हुन् । उनीहरूले त्यहाँ भएको क्षतिको विवरण लिनुका साथै दलका प्रतिनिधिसँग छलफल गरेका छन् । पेरिसडाँडामा भएको छलफलपछि मन्त्री सिन्हाले आन्दोलनका क्रममा भागेका अधिकांश कैदीबन्दी पक्राउ र लुटिएका धेरै हतियार बरामद भएकाले संगठितरूपमा अपराध हुन सक्ने कुनै सम्भावना नरहेको तथा निर्वाचनको वातावरण बन्दै गएको विश्वास दिलाए ।

उनले राजनीतिक संवादमार्फत निर्वाचनमा जानुको विकल्प नरहेको जनाउँदै लोकतन्त्र पुनःस्थापित गरी संविधानको मर्म र भावना प्रतिनिधिसभाको निर्वाचन गरी अघि बढ्नुपर्ने आवश्यकता औंल्याए । ‘आन्दोलनका क्रममा दलका भौतिक संरचना केकति क्षति भए, कसरी पुनर्निर्माण भएको भइरहेको छ त्यो हेर्न आएका हौं,’ उनले भने, ‘दलका पदाधिकारीसँगको छलफलमा निर्वाचन सुरक्षाबारे विभिन्न प्रश्न उठेका छन् । तर चुनावको विकल्प छैन भन्नेमा विवाद छैन ।’

छलफलका क्रममा केही सुरक्षा र केही नेताहरूसँगको विषयको प्रश्न उठेको बताउँदै उनले प्रमुख दलहरूको सम्पर्क तल्लो तहसम्म भएकाले एक पटक चुनावी नारा तलसम्म पुर्‍याएर चुनावी वातावरण बनाउन अनुरोध गरिएको जानकारी दिए ।

सरकारले मन्त्री सिन्हाको संयोजकत्वमा गठित राजनीतिक वार्ता समितिले निर्वाचन आयोगको तयारी सम्बन्धमा मुख्य दलकै कार्यलयमा गएर छलफल गर्ने निर्णयअनुरूप उनीहरू पुगेका हुन् । मन्त्री सिन्हाले भने, ‘भदौ २३ र २४ को घटना दुर्भाग्यपूर्ण छ, यो अवस्था आउनुमा धेरै आयाम छन् । धेरै जनधनको क्षति भयो, यो अस्वाभाविक छ । संविधानभन्दा बाहिर गएर काम गर्न सक्दैनौं । चुनावमा जाऔं ।’

सरकारका प्रवक्तासमेत रहेका सञ्चारमन्त्री खरेलले सरकार इमानदारीकासाथ निर्वाचन गराउन खोजिरहेको छ भन्ने स्पष्ट सन्देश प्रवाह गर्न आफूहरू दलका कार्यायले पुगेर संवाद गरेको बताए । उनले भने, ‘निर्वाचनका लागि यो राजनीतिक दललाई सकारात्मक दबाब हो, हामी चुनाव चाहन्छौं, चुनावको तयारी यो गरेका छौं भन्ने स्पष्ट सन्देश हो ।’

निर्वाचनमा भाग लिनुहोस् भनेर सरकार राजनीतिक दलको कार्यालयमा पुगेको यो नै पहिलो पटक भएको बताउँदै सञ्चारमन्त्री खरेलले यसबाट सरकार निर्वाचन गराउन कति प्रतिबद्ध छ भन्ने स्पष्ट सन्देश रहेको बताए । नेकपाको कार्यालय अवलोकनका क्रममा सो पार्टीका संयोजकले पदाधिकारीका तर्फबाट स्पष्ट कुरा आएको उल्लेख गर्दै उनले भने, ‘संसद् पुनःस्थापना गर्न हुँदैन, अब चुनावमै जानुपर्छ भन्नुभएको छ ।’ जेनजीले उठाएका माग सम्बोधन भएन भने थप जटिलता हुनेतर्फ आफूहरूलाई भनेको उल्लेख गर्दै उनले नेकपाले स्पष्टरूपमा निर्वाचनमा जानुपर्ने धारणा राखेको जानकारी दिए ।

मन्त्री खरेलले सरकार, राजनीतिक दल र जनता निर्वाचनको बाटोमा होमिनुपर्छ भन्नेमा सबै दल स्पष्ट रहेको आफूहरूले पाएको स्पष्ट पारे । नेताहरूलाई सरकार निर्वाचन गराउन प्रतिबद्ध रहेको विश्वास दिलाएको उनले बताए । ‘सरकारले निर्वाचनको वातावरण बनाउँछ, अब निर्धारित मितिमा चुनाव हुन्छ,’ उनले भने ।

अनुगमनका क्रममा मन्त्रीहरू बुधबार जनमत, राप्रपा र रास्वपाको कार्यालय जाने भएका छन् ।