उपेन्द्र–महन्थको पार्टी एकता

काठमाडौं – प्रतिनिधि सभाका लागि घोषित निर्वाचनलाई ध्यानमा राख्दै दलहरूबीच ध्रुवीकरणमा तीव्रता छ । आइतबार जनता समाजवादी पार्टी (जसपा) र लोकतान्त्रिक समाजवादी पार्टी (लोसपा) नेपालले पार्टी एकता सहमति गरेका छन् ।

सहमति पत्रमा दुवै पार्टीका अध्यक्षहरूले हस्ताक्षर गरेका छन् । जसपा अध्यक्ष उपेन्द्र यादव र लोसपा अध्यक्ष महन्थ ठाकुरसहित दुवै पार्टीका पदाधिकारीहरूको काठमाडौंमा बसेको संयुक्त बैठकले एकीकरण गर्ने निर्णय गरेको लोसपा नेता सुरेन्द्र झाले बताए ।

वर्तमान राजनीतिक परिस्थितिको मूल्यांकन एवं विश्लेषण गरेर एकता गरिएको सम्झौतापत्रमा भनिएको छ । संघीय लोकतान्त्रिक गणतन्त्रात्मक प्रणालीलाई संस्थागत गर्दै संघीयता, पहिचान, समानुपातिक समावेशिता, समाजिक न्याय लगायतको अग्रगामी परिवर्तनका मुद्दाहरूलाई मजबुत गर्दै न्यायपूर्ण समाज निर्माण गर्ने आवश्यकतालाई आत्मसात गरी एकीकरणको निर्णय भएको सहमतिपत्रमा उल्लेख छ ।

२०७७ वैशाख दोस्रो साता तत्कालीन संघीय समाजवादी पार्टी र राष्ट्रिय जनता पार्टी एकीकरण भएर जसपा बनेको थियो । डेढ वर्ष नपुग्दै २०७८ को भदौ दोस्रो साता जसपा नेपाल विभाजन भएर महन्थ ठाकुर नेतृत्वको लोसपा बनेको थियो । २०६३ सालपछि मधेसी जनअधिकार फोरममार्फत आन्दोलन अघि बढाएर उपेन्द्र यादव र कांग्रेस परित्याग गर्दै महन्थ ठाकुरले मधेशको राजनीतिक शक्तिका रुपमा आफ्‌नो प्रभाव बढाएका थिए ।