दिउँसो बज्ने ‘पत्रु खाजा’ विज्ञापनमा प्रतिबन्ध

लण्डन । बेलायतमा सोमबारदेखि लागू भएको नयाँ नियमले दिउँसोको समयमा जंक फुडको टिभी र अनलाइन विज्ञापनहरूमा प्रतिबन्ध लगाएको छ । यसलाई बेलायत सरकारले बाल्यकालको मोटोपनाको सामना गर्न ‘विश्वकै अग्रणी कार्य’ भनी अर्थ्याएको छ ।

प्रतिबन्धित चिल्लो पदार्थ, नुन वा चिनी बढी हालिएका खाजा र पेय उत्पादनका विज्ञापनहरूलाई लक्षित गर्दै हरेक वर्ष बच्चाहरूको आहारबाट उल्लेख्य क्यालोरीहरू हटाउने अपेक्षाले यो नयाँ नियम लागू गरिएको स्वास्थ्य मन्त्रालयले जनाएको छ ।

साँझ नौ बजे भन्दा पहिले प्रसारण हुने यस्ता विज्ञापनहरू बन्द गर्दै यसले मोटोपना भएका बालबालिकाको संख्या २० हजारले घटाउने अपेक्षा राखिएको छ । यसको कार्यान्वयन–पहिलो पटक डिसेम्बर २०२४ मा घोषणा गरिएको जनाइएको छ । जसमा प्याकेटमा राखिएका वस्तुहरू जस्तै मिल्कशेक, रेडी–टु–गो कफी र मीठो दहीजस्ता पेयपदार्थहरू समावेश गरिएका छन् । स्थानीय अधिकारीहरूलाई विद्यालयबाहिर राखिने फास्ट फूड पसलहरूलाई हटाउने अधिकार पनि दिइएको छ । सरकारले विज्ञापनले बच्चाहरूलाई प्रभावित पारी कम उमेरदेखि नै जंक फुड खान प्रेरित गरी मोटोपना र सम्बन्धित रोगहरूको जोखिम बढाउने तर्क प्रस्तुत गरेको छ ।

यसले इंगल्याण्डमा प्राथमिक विद्यालय सुरु गर्ने पाँच वर्ष उमेरका २२ प्रतिशत बालबालिकाहरूमा अधिक तौल वा मोटोपनले ग्रसित हुने र माध्यमिक विद्यालयमा पुग्दासम्म प्रभाव झनै बढी हुने गरेको जनाइएको छ । अधिकारीहरूका अनुसार सामान्यतया पाँचदेखि नौ वर्ष उमेरका साना बच्चाहरू जंक फुडको सेवनपछि दाँतको समस्या समाधानका लागि अस्पतालमा भर्ना हुने गरेका छन् ।

‘राति ९ बजे भन्दा पहिले जंक फूडका लागि विज्ञापनहरू प्रतिबन्धित गरी अस्वस्थ्यकर खाजाको अत्यधिक जोखिम हटाउने स्वास्थ्य मन्त्री एशले डाल्टनले विज्ञप्तिमार्फत जनाएका छन् ।

उनले यो कदम सरकारले चलाएको राष्ट्रिय स्वास्थ्य सेवा (एनएचएस)लाई रोगको रोकथामका साथै उपचारमा ध्यान केन्द्रित गर्ने रणनीतिको एक हिस्सा भएको बताउँदै मानिसहरूले स्वस्थ जीवन बिताउन सकून् भन्ने अभिप्रायले गरेको बताएका छन् । ओबेसिटी हेल्थ एलायन्सका कार्यकारी निर्देशक क्याथरिन जेनरले यो कदम बच्चाहरूलाई उनीहरूको स्वास्थ्यलाई हानि पुर्‍याउने अस्वस्थ्यकर खाना र पेय पदार्थको विज्ञापनबाट संरक्षण गर्ने दिशामा स्वागतयोग्य र लामो समयदेखि प्रतीक्षा गरिएको विषय भएको बताएका छन् । परोपकारी संस्था ‘मधुमेह बेलायत’ले पनि विज्ञापन प्रतिबन्धलाई स्वागत गरेको छ ।