एपष्टेन मुद्दाको ढिलाइले दबाबमा ट्रम्प

वासिङ्टन । अमेरिकी न्याय मन्त्रालयले दोषी ठहर भइसकेका यौन अपराधी जेफ्री एपष्टेनसँग सम्बन्धित २० लाखभन्दा बढी कागजातहरू अझै पनि समीक्षाको प्रक्रियामा रहेको जनाएको छ । ती सबै फाइल सार्वजनिक गर्ने समयसीमा थप दुई हप्ताभन्दा बढी सारिएको विभागले सोमबार जानकारी दिएको हो ।

मन्त्रालयले गत महिना फाइनान्सर एपष्टेनमाथि दशकौंसम्म गरिएको अनुसन्धानसँग सम्बन्धित कागजातहरू सार्वजनिक गर्न सुरु गरेको थियो । तर ‘एपष्टेन फाइल ट्रान्सपरेन्सी ऐन’अनुसार तोकिएको डिसेम्बर १९ को अन्तिम म्याद पूरा गर्न विभाग असफल भएको थियो । सोमबार संघीय न्यायाधीशलाई पठाइएको पत्रमा मन्त्रालयका अधिकारीहरूले २० लाखभन्दा बढी कागजातहरू अहिले पनि ‘समीक्षाका विभिन्न चरणमा’ रहेको उल्लेख गरेका थिए । पत्रअनुसार हालसम्म १२ हजार २८५ कागजात सार्वजनिक गरिएको छ, जसमा करिब एक लाख २५ हजार पृष्ठ समावेश छन् । यो संख्या हाल समीक्षामा रहेका कागजातहरूको एक प्रतिशतभन्दा पनि कम हो ।

मन्त्रालयले डिसेम्बर २४ मा प्रारम्भिक समीक्षामा समावेश नगरिएका १० लाखभन्दा बढी अतिरिक्त फाइलहरू पहिचान गरेको जनाएको छ । तीमध्ये केही कागजात दोहोरिएका (डुप्लिकेट) देखिए पनि तिनको ‘प्रशोधन र डिडुप्लिकेसन’ अझै आवश्यक रहेको पत्रमा उल्लेख गरिएको छ । महान्यायाधिवक्ता पाम बोन्डी र अन्य सम्बन्धित अधिकारीहरूले हस्ताक्षर गरेको पत्रमा ‘अझै पनि पर्याप्त काम बाँकी छ’ भनेर स्पष्ट गरिएको छ । विभागका अनुसार ४०० भन्दा बढी मन्त्रालयका वकिलहरूले आगामी केही हप्तासम्म यी कागजातहरूको विस्तृत समीक्षा गर्नेछन् । यसका साथै ‘संवेदनशील पीडित जानकारी’ सुरक्षित रूपमा कारबाही गर्न विशेष तालिम प्राप्त कम्तीमा एक सय जना एफबिआई कर्मचारीले सहयोग गर्नेछन् । मन्त्रालयले पीडितहरूको पहिचान खुल्न सक्ने विवरणलाई विशेष सावधानीका साथ जाँच गर्नुपर्ने भएकाले समीक्षा प्रक्रिया ढिलो भएको जनाएको छ ।

यसैबीच राष्ट्रपति डोनाल्ड ट्रम्पले एपष्टेनसँग सम्बन्धित सबै फाइल समयमै सार्वजनिक गर्न नसकेको विषयलाई लिएर डेमोक्रेट दलबाट कडा दबाबको सामना गरिरहेका छन् । तर ट्रम्प प्रशासनले पीडितहरूको गोपनीयता र संवेदनशील जानकारीको सुरक्षा सुनिश्चित गर्नु आफ्नो प्रमुख जिम्मेवारी भएकाले ढिलाइ भएको भन्दै आफ्नो कदमको बचाउ गरेको छ । सोमबारको मन्त्रालयका अधिकारीहरूले एपष्टेन फाइलहरू ‘पीडितको पहिचान गर्ने जानकारी’ हटाउनका लागि एक–एक गरी समीक्षा गर्नुपर्ने आवश्यकता औंल्याउँदै यही कारणले प्रक्रिया अपेक्षाभन्दा लामो भएको स्पष्ट पारेका छन् ।