टेलिकमले ल्यायो अनलाइन केवाईसी अपडेट सेवा

काठमाडौं – नेपाल टेलिकमले जीएसएम प्रिपेड सिमकार्ड प्रयोगकर्ता ग्राहकका विवरण अद्यावधिक गर्न क्युआर कोडमार्फत अनलाइन रूपमा लिंक प्राप्त गरी अपडेट गर्न सकिने सेवाको परीक्षण शुभारम्भ गरेको छ । हाल दूरसञ्चार कार्यालय, सुन्धाराबाट उक्त सेवाको परीक्षण सुरु गरिएको हो ।

उक्त परीक्षण कार्यको शुभारम्भ नेपाल टेलिकमका प्रमुख व्यावसायिक अधिकृत गंगासागर मातन्छे र प्रादेशिक निर्देशनालय काठमाडौं, बागमती प्रदेशका निर्देशक इन्दल यादवले संयुक्त रूपमा गरेका हुन् ।

कार्यक्रममा प्रमुख व्यावसायिक अधिकृत मातन्छेले यस सेवाले नेपाल टेलिकमका सेवाहरूलाई थप ग्राहकमैत्री बनाउन महत्वपूर्ण भूमिका खेल्ने विश्वास व्यक्त गरे । त्यस्तै, निर्देशक यादवले थोरै समयमा धेरै कार्य सम्पन्न हुन सक्ने भएकाले कम्पनीको उत्पादकत्वमा समेत सकारात्मक प्रभाव पर्ने धारणा राखे ।

दूरसञ्चार कार्यालय, सुन्धाराका कार्यालय प्रमुख निर्मल चटौतले डिजिटल रूपान्तरण, पेपरलेस कार्य प्रणाली र डाटा अद्यावधिक प्रक्रियामा यो सेवाले सहयोग पुग्ने अपेक्षा व्यक्त गरे । यस सेवा अन्तर्गत हाल आफ्नो नाम वा अन्य विवरण सच्याउनुपर्ने अवस्थामा रहेका ग्राहकहरूले ग्राहक सेवा केन्द्रमा राखिएको क्युआर कोड स्क्यान गरी आवश्यक विवरण भर्न सक्नेछन् । सो विवरणको आधारमा नेपाल टेलिकमको प्रणालीले ग्राहकको विवरण प्रमाणित गरी अद्यावधिक गर्ने व्यवस्था गरिएको छ । पहिलो चरणमा क्युआर कोडमार्फत स्क्यान गरी विवरण भर्न सकिने व्यवस्था गरिएको छ भने भविष्यमा नेपाल टेलिकमको वेबसाइट तथा मोबाइल एपमार्फत समेत ग्राहक विवरण अद्यावधिक गर्न सकिने सुविधा उपलब्ध गराइने जनाइएको छ ।

हाल सुन्धारास्थित दूरसञ्चार कार्यालयबाट परीक्षण सुरु गरिएको यो सेवा परीक्षण सफल भएपछि क्रमशः काठमाडौं उपत्यकाका अन्य कार्यालयहरू तथा उपत्यकाबाहिरका कार्यालयहरूमा समेत विस्तार गरिने टेलिकमले जनाएको छ ।