डीभीमा अमेरिका उडे वडाध्यक्ष

काठमाडौं – नुवाकोटको बेलकोटगढी नगरपालिका–११ का वडाध्यक्ष प्रकाशजंग पाण्डे अमेरिका उडेका छन् । उनी बुधबार त्रिभुवन अन्तर्राष्ट्रिय विमानस्थल काठमाडौंबाट त्यसतर्फ प्रस्थान गरेका हुन् । काठमाडौं आउनुअघि उनलाई वडा कार्यालयमा बिदाइ कार्यक्रम गरिएको थियो । उनले फोटो खिचाएर आफूले प्रयोग गर्ने गरेको सरकारी मोटरसाइकल फिर्ता गरेका थिए । एक स्थानीयले वडाध्यक्ष विदेशिएको विषयले आश्चर्यमा परेको बताए । ‘केही गर्छु भनेर ५ वर्षका लागि मत मागेको व्यक्ति आफैं विदेशिएको खबरले अचम्म लागेको छ, दुःख पनि लागेको छ,’ उनका एक वडाबासीले भने ।

बेलकोटगढी–११ का माधव तिवारीले सामाजिक सञ्जालबाट पाण्डे अमेरिका उडेको जानकारी दिएका छन् । पाण्डेकी पत्नीलाई डीभी परेको थियो । त्यसैले पाण्डे दम्पती अमेरिका गएका हुन् । पाण्डे कांग्रेसबाट निर्वाचित वडाध्यक्ष हुन् । यसरी पत्नीलाई डिभी परेर अमेरिका जाने पाण्डे पहिलो वडाध्यक्ष भने होइनन् । यअसघि कास्कीको मादी गाउँपालिका–१२ का वडाध्यक्ष कृष्णराज दाहाल २०८१ असार १६ मा कार्यवाहक दिएर अमेरिका उडेका थिए । निर्वाचित जनप्रतिनिधि नै कार्यकाल बाँकी छँदै विदेशिँदा काममा समस्या हुने गरेको छ ।