दुई विद्यार्थीलाई एमबीबीएस छात्रवृत्ति

काठमाडौं – दुई नेपाली विद्यार्थीले चिकित्सा शास्त्र पढ्न गैरआवासीय नेपाली संघको छात्रवृत्ति पाएका छन् । कपिलवस्तुका सचिनकुमार प्रजापति र चितवनकी भावना रेग्मीले छात्रवृत्ति प्राप्त गरेको एनआरएनएले जनाएको हो । 

उनीहरूले चिकित्सा शिक्षा आयोगको कमन इन्ट्रान्स परीक्षा २०८२ उत्तीर्ण गर्दै उत्कृष्ट नतिजा हासिल गरेका छन् । एनआरएनए र एसिया इन्टरनेशनल युनिभर्सिटी उज्वेकिस्तानबीच योग्य तर आर्थिक अवस्था कमजोर परिवारका दुई जनालाई एमबीबीएस अध्ययनका लागि छात्रवृत्ति दिने समझदारी छ । उक्त समझदारी अन्तर्गतको छनोटमा प्रजापति र रेग्मीले अवसर पाएका हुन् । छात्रवृत्तिअन्तर्गत शैक्षिक शुल्क, होस्टल, भोजन, भिसा, बीमा र नेपाल–उज्बेकिस्तान हवाई यात्रा खर्चहरूको सुविधा हुनेछ । अध्ययन अवधिमा कुनै परीक्षा अनुत्तीर्ण भएमा छात्रवृत्ति स्वतः रद्द हुनेछ भने विद्यार्थीहरूले उज्बेकिस्तानबाट पढाइ पुरा गरेपछि नेपालमा कम्तीमा दुई वर्ष सेवा गर्नुपर्ने सर्त छ ।