सानिमा रिलायन्सका शेयरधनीलाई ५१ करोड

काठमाडौं – सानिमा रिलायन्स लाइफ इन्स्योरेन्सले शेयरधनीलाई दिन प्रस्ताव गरेको लाभांश साधारण सभाबाट पारित भएको छ । गत आर्थिक वर्षको मुनाफाबाट शेयरधनीलाई चुक्ता पुँजीको १०.१७८० प्रतिशत नगद लाभांश दिने प्रस्ताव पारित गरेको हो । 

काठमाडौंको गोल्फुटारमा बिहीबार सम्पन्न कम्पनीको नवौं वार्षिक साधारण सभाले पारित गरेको प्रस्तावअनुसार कर प्रयोजनसहित ५१ करोड ४ लाख १८ हजार ९७० रुपैयाँ लाभांश वितरण गरिनेछ । साधारण सभाले संचालक समितिका तर्फबाट अध्यक्ष रतनलाल केडियाले प्रस्तुत गरेको वार्षिक प्रतिवेदनका साथै गत आवको लेखा परीक्षण प्रतिवेदन र वित्तीय विवरण पनि पारित गरेको छ । साधारण सभामा कम्पनीका प्रमुख कार्यकारी अधिकृत शिवनाथ पाण्डेले संस्थागत सुशासन, ग्राहकमुखी सेवा, अभिकर्तामैत्री उत्प्रेरणात्मक कार्यक्रम, शाखा सञ्जाल विस्तार, मजबुत आन्तरिक नियन्त्रण प्रणाली, खर्चमा मितव्ययिता लगायत कारण बीमा बजारमा कम्पनी सम्मानजनक स्थान ओगट्न सफल भएको बताएका थिए । उनले मर्जरमा आएका चुनौतीलाई धैर्यतापूर्वक व्यवस्थापन गर्दै कम्पनीलाई सबल तरिकाले अगाडि बढाएको पनि उल्लेख गरे ।