समानुपातिकतर्फ ८५ नाम फिर्ता

काठमाडौं – समानुपातिक तर्फको बन्दसूचीबाट नाम फिर्ता लिनेको संख्या ८५ पुगेको छ । निर्वाचन आयोगका प्रवक्ता नारायणप्रसाद भट्टराईका अनुसार दलहरुले बुझाएका सूचीबाट नाम फिर्ताका लागि उल्लेख्य संख्यामा निवेदन परेको छ । अन्तिममा संख्या बढ्न सक्ने उनले बताए ।

प्रतिनिधि सभा सदस्यको निर्वाचनका लागि दलहरूले पुस १३ र १४ मा समानुपातिक तर्फको बन्दसूची आयोगमा बुझाएका थिए । आयोगले दलहरुलाई आइतबारसम्म समावेशी क्लस्टर मिलाउने समय दिएको थियो ।

सोमबारसम्म उम्मेदवारी फिर्ताको समय थियो । 

उम्मेदवारी फिर्ताका लागि उम्मेदवार स्वयं आयोगमा उपस्थित भएर वा वारेसमार्फत् निवेदन दिन पाइने व्यवस्था आयोगले गरेको थियो । उम्मेदवारी फिर्ताको निवेदन भेला पारेर आयोगले सम्बन्धित दलहरुलाई त्यसबारे जानकारी दिनेछ भने पछि दलहरुले खाली ठाउँमा अरु नाउँ दिन सक्नेछन् । यसबीच केही दलका उममेदवारले आलोचना भएपछि नाम फिर्ता लिएका छन् भने केहीले पार्टीको च्नावी एकतासँगै आफूले पेस गरेको बन्द सूची सच्याउने निर्णय गर्दा पहिले पेस गरेका नाम फिर्ता लिनुपर्ने भएको छ ।