नबिल बैंकको अध्यक्षमा चौधरी

काठमाडौं – नबिल बैंकको सञ्चालक समितिको ६९९औँ बैठकले बैंक सञ्चालक समितिको अध्यक्षमा निर्वाणकुमार चौधरीलाई चयन गरेको छ । सोमबार बैंकको ४१ औं वार्षिक साधारणसभा सम्पन्न भई बसेको सञ्चालक समितिको बैठकले चौधरीलाई अध्यक्ष चयन गरेको हो ।

निवर्तमान अध्यक्ष उपेन्द्रप्रसाद पौडेलले दुई कार्यकाल सम्पन्न गरेपछि सञ्चालक समितिको अध्यक्षमा चौधरी चयन भएका हुन् । पौडेलको नेतृत्वमा बैंकले दिगो बैंकिङमा उल्लेखनीय उपलब्धि हासिल गरेको छ । उनले विशेष गरी टिम निर्माण, डिजिटल रूपान्तरणको सुदृढीकरण, दिगो बैंकिङ, नबिल स्कूल अफ सोसल इन्टरप्रेनरसिप (नबिल एसएसई)का साथै मर्जर सफल बनाउनका लागि समेत महत्वपूर्ण भूमिका निर्वाह गरेका थिए । बैंकको वार्षिक साधारणसभाले शेयरधनीलाई वितरण गर्न सञ्चालक समितिले प्रस्ताव गरेको १२.५० प्रतिशत नगद लाभांश पारित गरेको छ । सोमबार बैंकका अध्यक्ष उपेन्द्रप्रसाद पौडेलको अध्यक्षतामा सम्पन्न साधारणसभाले आर्थिक वर्ष २०८१/८२ को मुनाफाबाट प्रस्ताव गरेको लाभांश पारित गरेको हो ।

साधारणसभाले संस्थापक शेयरधनीतर्फबाट सञ्चालक समितिमा संस्थापक शेयरधनी समूहको प्रतिनिधित्व गर्ने एक सञ्चालक पदमा अनिल केशरी शाहलाई निर्विरोध निर्वाचित गरेको छ ।

चालु आर्थिक वर्ष २०८२/८३ मा बैंकले ५ अर्ब बराबरको ‘नबिल ८ प्रतिशत अविमोच्य असञ्चिति अग्राधिकार शेयर’ नयाँ पुँजी उपकरण जारी गरेको छ । उक्त उपकरण जारी गरेपश्चात अतिरिक्त प्राथमिक पुँजीका माध्यमबाट पुँजीगत आधार बलियो भई बैंकको जोखिम वहन गर्ने क्षमता बढ्ने र व्यवसाय विस्तारमा थप सहयोग पुग्ने बैकले विश्वास लिएको छ ।