पंगेनीको पोस्टर अन्तर्राष्ट्रिय प्रतियोगितामा तेस्राे

काठमाडौं — नेपालका १५ वर्षीय विद्यार्थी अनुराग पंगेनीले २०२५ को भ्रष्टाचारविरोधी सामाजिक विज्ञापनका लागि अन्तर्राष्ट्रिय युवा प्रतियोगितामा तेस्रो स्थान हासिल गरेका छन् ।

‘युवा समाजको दरारहरू सुधार गर्नुहोस्’ शीर्षकको अन्तर्राष्ट्रिय प्रतियोगिता अन्तर्गत १० देखि १५ वर्ष उमेर समूहको प्रतिस्पर्धामा उनी तेस्रो भएका हुन् । पंगेनीले तेस्रो स्थान हासिल गरेको रुसी दूतावासले जनाएको हो । दूतावासले पंगेनीलाई बधाईसमेत दिएको छ ।

उनको पोस्टर युवाहरूमाझ इमानदारी, जवाफदेहिता र सामाजिक जिम्मेवारीलाई प्रवर्धन गर्ने शक्तिशाली सन्देश र रचनात्मक अभिव्यक्तिको लागि अन्तर्राष्ट्रिय प्रविष्टिहरूमध्ये एक रहेको भन्दै दूतावासले भ्रष्टाचारविरुद्धको विश्वव्यापी लडाइमा अर्थपूर्ण योगदान र युवा नेतृत्वको सामाजिक संलग्नताको प्रेरणादायी उदाहरण भएको बताएको छ ।

आफूले बनाएको पोस्टरले नेपाली समाजलाई भ्रष्टाचारले भाँचिएको कमजोर सिसाको संरचनाको रूपमा देखाएको भन्दै अनुरागले पैसा मिसाइएको दाउराले प्रतीकात्मक रूपमा, लोभ र बेइमानीको प्रतिनिधित्व गर्नुका साथै भ्रष्टाचारले युवाहरूको अवसरलाई कसरी खतरामा पार्छ भनेर देखाएको बताएका छन् । तर आशाको बारेमा आफ्नो पोस्टरको वास्तविक सन्देश भएको उनले बताए । प्रतियोगितामा अल्जेरियाकी १४ वर्षीया फातिमा रावन प्रथम, उज्वेकिस्तानका १४ वर्षीय सोख्जाखोन अब्लुल्लाइभ दोस्रो भएका छन् । पंगेनीसँगै पाकिस्तानका १४ वर्षीय सदिया जाफरले पनि तृतीय स्थान हासिल गरेका दूतावासले जनाएको छ ।