महालक्ष्मी विकास बैंकले माघलाई बनायो डिजिटल प्रवर्धन महिना

काठमाडौं – ग्राहकहरूलाई अत्याधुनिक, सुरक्षित तथा सहज डिजिटल बैंकिङ सुविधा उपलब्ध गराउँदै आएको महालक्ष्मी विकास बैंकले डिजिटल कारोबार प्रवर्द्धन गर्न, ग्राहक सुविधा अभिवृद्धि गर्न तथा सुरक्षित र नगद रहित बैंकिङ कारोबारलाई बढावा दिन ‘महालक्ष्मी माघ महोत्सव’ डिजिटल प्रवर्द्धन महिना सञ्चालन गर्ने भएको छ । बैंकले हरेक वर्षको माघ महिनालाई डिजिटल कारोबार प्रवर्द्धन महिनाको रुपमा मनाउने निर्णय पनि गरेको छ ।

दैनिक कुल कारोबार संख्यामा बैंकको डिजिटल कारोबारको संख्या ८० प्रतिशतभन्दा बढी रहेको बैंकले जनाएको छ । बैंकले यस्तो कारोबारहरूलाई थप वृद्धि गर्न डिजिटल सेवामा विभिन्न आकर्षक सुविधाहरू पनि थप गरेको छ । मोबाइल एप ‘महालक्ष्मी स्मार्ट साथी’ मार्फत मुद्दती खाता खोल्दा बढी ब्याजदर प्रदान गर्ने भएको छ । जसमा व्यक्तिगत मुद्दतीमा प्रदान गर्ने ब्याजदर भन्दा ०.२५ प्रतिशत बढी ब्याजदर प्राप्त गर्न सक्नेछन् ।

त्यसैगरी भर्चुअल तथा क्रेडिट कार्ड जारी गर्दा वार्षिक शुल्कमा १०० प्रतिशत छुट प्रदान गरेको छ । डेबिट कार्ड जारी गर्दा तथा मोबाइल बैकिङ दर्ता गर्दा १०० प्रतिशत छुट प्रदान गर्नेछ । ग्राहकहरूले मोबाइल एप मार्फत फार्मेसीको बिल भुक्तानी गर्दा बिल रकमको २० प्रतिशत वा २०० रुपैयाँ सम्मको क्यासब्याक प्राप्त गर्नेछन् ।

अडियो मार्फत भुक्तानी प्राप्त भए नभएको सुचना प्रदान गर्ने ‘कोइली’ दर्ता गर्दा समेत शुल्क लाग्ने छैन । यो अभियान २०८२ साल माघ महिनाको लागि मात्र लागू हुने बैंकले जनाएको छ ।

यो अभियानबाट बैंकिङ सेवाहरूको पहुँचमा वृद्धि गर्न, डिजिटल सेवालाई थप विस्तार गर्न तथा प्रत्यक्ष रुपमा बैंकमा उपस्थित हुनुपर्ने बाध्यतालाई न्यूनीकरण गर्न टेवा पुग्ने विश्वास बैंकले लिएको छ । साथै नगद कारोबारको सीमा घट्दै जाँदा यस अभियानले डिजिटल कारोबारलाई प्रवर्द्धन गर्न सहयोग पुग्ने विश्वास समेत बैंकले लिएको छ ।