काठमाडौँ महानगरको तीन वर्षको आय–व्यय प्रक्षेपण

काठमाडौं – काठमाडौँ महानगरपालिकाको राजस्व परामर्श समितिले आगामी तीन आर्थिक वर्षका लागि आय तथा व्यय प्रक्षेपण गरेको छ । उपप्रमुख एवं समितिका संयोजक सुनिता डंगोलको अध्यक्षतामा बुधबार बसेको बैठकले महानगरपालिकाका आन्तरिक आयका स्रोत, राजस्वका क्षेत्र र दायरा तथा खर्चको अवस्थाको समीक्षा गर्दै प्रक्षेपण तयार पारेको हो ।

बैठकले आर्थिक वर्ष २०८३/०८४ का लागि १५ अर्ब १३ करोड ३० लाख ५५ हजार रुपैयाँ, आर्थिक वर्ष २०८४/०८५ का लागि १५ अर्ब ५१ करोड ८१ लाख ६० हजार रुपैयाँ र आर्थिक वर्ष २०८५/०८६ का लागि १५ अर्ब ९८ करोड ८६ लाख ६५ हजार रुपैयाँ आय हुने अनुमान गरेको छ ।

महानगरपालिकाका अनुसार आर्थिक वर्ष २०८१/०८२ मा यथार्थ आय १० अर्ब ७४ करोड ४४ लाख ५४ हजार रुपैयाँ रहेको थियो। चालु आर्थिक वर्ष २०८२/०८३ का लागि भने महानगरपालिकाले १५ अर्ब ११ करोड ४३ लाख ४१ हजार रुपैयाँ आय लक्ष्य निर्धारण गरेको छ । सो लक्ष्यअनुसार हालसम्म ५ अर्ब ६९ करोड रुपैयाँ आय संकलन भइसकेको जानकारी दिइएको छ ।

राजस्व परामर्श समितिले आगामी दिनमा आयका स्रोत विस्तार, कर तथा शुल्कको दायरा व्यवस्थित गर्ने र खर्चलाई परिणाममुखी बनाउँदै वित्तीय अनुशासन कायम गर्ने विषयमा समेत छलफल गरेको महानगरपालिकाले जनाएको छ ।