१० जनालाई पक्रन ९ घण्टाको अपरेसन

काठमाडौं, माघ १५

जेनजी आन्दोलनका बेला हिरासतबाट फरार अभियुक्तको नेतृत्वमा काठमाडौं उपत्यकामा योजनाबद्ध रूपमा लुटपाटको आतंक मच्चाइएको खुलेको छ । प्रहरीले बुधबार बेलुकी नौ घण्टाको अपरेसनमा गोली चलाएर १० जनालाई पक्राउ गरेपछि उक्त गिरोहको संरचना र पृष्ठभूमि सार्वजनिक भएको हो ।

जिल्ला प्रहरी परिसर काठमाडौंले बिहीबार पत्रकार सम्मेलन गर्दै घटनाबारे विस्तृत सार्वजनिक गरेको छ । प्रहरीका अनुसार यो गिरोहका मुख्य नाइके काभ्रे भुम्लु–३ का २३ वर्षीय विनय तामाङ हुन् । उनी डाँका–चोरी मुद्दामा पक्राउ परी प्रहरी वृत्त महाराजगञ्जको हिरासतमा रहँदा जेनजी आन्दोलनका बेला मौका छोपी फरार भएका थिए । त्यसपछि समूह बनाइ उपत्यकाका विभिन्न स्थानमा शृंखलाबद्ध लुटपाट गराएको अनुसन्धानबाट खुलेको जिल्ला प्रहरी परिसर काठमाडौंका एसएसपी रमेश थापाले बताए ।

विनयकै योजनामा रातको समयमा समूहले सुनका गरगहना, नगद र मोबाइल लुटपाट गर्ने गरेको थियो । ‘हिरासतबाट फरार भएका विनय नै यो गिरोहको मुख्य योजनाकार रहेको र उनकै निर्देशनमा समूह परिचालित देखिन्छ,’ थापाले भने ।

पछिल्लो समय राति सडकमा हिँडडुल गर्ने सर्वसाधारण निरन्तर लुटिने गरेको उजुरी बढेपछि प्रहरीले अनुसन्धान थालेको थियो । सीसीटीभी फुटेज विश्लेषण गर्दा एउटा मोटरसाइकलमा तीन जना सवार भई लुटपाट गरेर फरार हुने शैली देखिएपछि प्रहरी वृत्त स्वयम्भू, गौशाला र बौद्धको संयुक्त टोली परिचालन गरिएको थियो । बुधबार साँझ ६ बजेदेखि सुरु भएको अपरेसन बिहीबार बिहान ३ बजेसम्म चलेको थियो । त्यस क्रममा मुलपानी क्रिकेट मैदान नजिक चेकिङ पोस्टमा रोक्न खोज्दा विनय तामाङले प्रहरीलाई पेल्दै भाग्न खोजेका थिए । त्यसपछि प्रहरीले गोली चलायो, जो विनयको खुट्टामा लाग्यो । उनको राष्ट्रिय ट्रमा सेन्टरमा उपचार भइरहेको छ ।

प्रहरीका अनुसार विनयको गिरोहले स्वयम्भू, बौद्ध, गौशाला, बुढानीलकण्ठ, ठिमी लगायत उपत्यकाका विभिन्न स्थानमा कम्तीमा २७ पटक लुटपाट गरेको देखिएको छ । साग बेचेर फर्केका महिला, राति काम सकेर हिँडिरहेका व्यक्ति तथा मर्निङ वाकमा निस्केका महिलासमेत उनीहरूको निसानामा परेका थिए । अहिलेसम्म २७ जना पीडित प्रहरी सम्पर्कमा आएका छन् भने ४ वटा औपचारिक जाहेरी दर्ता भएको छ । यो संख्या अझै बढ्न सक्ने प्रहरीको अनुमान छ । लुटपाटका क्रममा एउटा मोटरसाइकलमा तीन जना सवार हुने, दुई जनाले लुटपाट गर्ने र मोटरसाइकल तयारी अवस्थामा राखेर फरार हुने शैली अपनाइएको थियो । उनीहरूले साथमा खुकुरीसमेत बोकेको पाइएको छ ।

प्रहरीका अनुसार गिरोहका सदस्यहरू दिनको समयमा ट्याक्सी र निजी कार लिएर रेकी गर्ने र राति गाडी थन्क्याएर एक ठाउँमा भेला भई खाना खाएपछि लुटपाटमा निस्कने गर्थे । ट्याक्सीका आफ्नै यात्रुहरूलाई समेत रेकी गरी मौका मिलेमा लुटपाट गर्ने प्रवृत्ति देखिएको छ । लुटपाटमा प्रयोग भएका ६ वटा पल्सर मोटरसाइकल, एउटा निजी कार र एउटा ट्याक्सी प्रहरीले बरामद गरेको छ । नम्बर प्लेट नचिनियोस् भनेर मोटरसाइकलको प्लेटमा हिलो छ्याप्ने गरिएको पनि अनुसन्धानबाट खुलेको छ ।      

पक्राउ पर्नेहरूमा विनय तामाङ, आयन माझी, सविन माझी, मनिष रसाइली, पेमा तामाङ, सलोन तामाङ, राजीव भण्डारी, विशाल तामाङ, विदुर विश्वकर्मा र फुर्वा तामाङ छन् । प्रहरीको क्रिमिनल रेकर्ड सिस्टम अनुसार पक्राउ परेका सबैजना पटके अभियुक्त हुन् । विनय तामाङ यसअघि २०७९ मा चोरी र त्यसपछि डाँका चोरी मुद्दामा पक्राउ परेका थिए ।          

अर्का नाइके आयन माझी पेसाले चालक हुन्, जसविरुद्ध २०७९ पुसमा भक्तपुरमा डाँका चोरीको मुद्दा चलेको छ । गहना बिक्री गर्ने  व्यक्ति विदुर विश्वकर्मा सुनचाँदी कालिगढ हुन् भने केही सदस्यहरू ट्याक्सी चालकसमेत रहेको प्रहरीले जनाएको छ । घटनाबारे थप अनुसन्धान भइरहेको र गिरोहसँग जोडिएका अन्यको खोजी जारी रहेको प्रहरीले जनाएको छ ।