‘सामुदायिक क्याम्पसका समस्या हल हुनेछन्’

काठमाडाैं । त्रिभुवन विश्वविद्यालयका उपकुलपति प्राडा दीपक अर्यालले पब्लिक क्याम्पस संघले उठाउँदै आएको सामुदायिक क्याम्पसका प्राध्यापक तथा कर्मचारीहरूको स्तर निर्धारण र क्याम्पसको नवीकरणमा रहेको झञ्झटिलो समस्या समाधान गर्ने प्रतिबद्धता जनाएका छन् ।                

सोमबार पशुपति बहुमुखी क्याम्पसको ४६औं वार्षिकोत्सव कार्यक्रममा बोल्दै उपकुलपति अर्यालले सामुदायिक क्याम्पसको स्तर निर्धारण र सुधार गर्न पनि विश्वविद्यालयले तयारी गरिरहेको बताए । उपकुलपति अर्यालले अनुसन्धान प्रवर्धनका लागि प्रत्येक क्याम्पसले आफ्नो आम्दानीको पाँच प्रतिशत बजेट जोहो गर्नुपर्ने उल्लेख गर्दै न्यूनतम साढे दुईदेखि पाँच प्रतिशतसम्म बजेट अनुसन्धानमा खर्च गर्न आग्रह गरे । ‘सामुदायिक क्याम्पसको शिक्षकका स्तर निर्धारण प्रक्रिया शीघ्र अघि बढाइनेछ । सो सम्बन्धमा विश्वविद्यलायले निर्णय गरिसकेको छ,’ उपकुलपति अर्यालले भने । सो अवसरमा क्याम्पस प्रमुख विनोदचन्द्र पन्तले युवा विद्यार्थीहरू कलेजको मुख्य सम्पत्ति भएको हुँदा विद्यार्थीलक्षित शैक्षिक कार्यक्रम सञ्चालन भइरहेको बताए । क्याम्पस व्यवस्थापन समिति अध्यक्ष प्राडा रमेशकुमार जोशीले कलेजका विभिन्न पक्षहरूमा आवश्यक सुधार गर्दै विश्वविद्यालयको सहयोगमा अघि बढ्ने विश्वास दिलाए ।                    

कार्यक्रममा उपकुलपति अर्यालले कलेजका संस्थापक तथा पूर्वक्याम्पस प्रमुख प्रा. प्रयागराज भट्टराई, पूर्वक्याम्पस प्रमुख प्रा. विष्णुप्रसाद पन्तलाई सम्मान गरे । कार्यक्रममा प्रकाशविक्रम राउत, दीपक पोखरेल, माधवप्रसाद पोखरेल र  रमा अधिकारी उत्कृष्ट प्राध्यापकबाट पुरस्कृत भए । साथै, उत्कृष्ट कर्मचारीहरू रञ्जना घिमिर रे पशुपति पौडेललाई पनि कार्यक्रममा सम्मान गरियो । कार्यक्रममा उत्कृष्ट विद्यार्थी, विभिन्न खेलकुद प्रतियोगिताका विजयी विद्यार्थीहरूलाई पुरस्कार तथा सम्मान गरिएको थियो ।