प्रादेशिक अस्पताल सिरहाका दुई प्रमुखसहित १० जनाविरुद्ध भ्रष्टाचार मुद्दा

सिरहा । प्रादेशिक अस्पताल सिरहामा बिरामीबाट संकलित रकममध्ये ३८ लाख ७७ हजार रुपैयाँ सरकारी खातामा जम्मा नगरी मिलेमतोमा भ्रष्टाचार गरेको अभियोगमा अख्तियार दुरूपयोग अनुसन्धान आयोगले आज विशेष अदालतमा आरोपपत्र दायर गरेको छ ।          

अस्पतालको ओपिडीलगायत विभिन्न काउन्टरबाट संकलन भएको राजस्व रकम सरकारी ढुकुटीमा दाखिला नगरी कर्मचारीहरूले व्यक्तिगत प्रयोगमा ल्याएको अनुसन्धानबाट पुष्टि भएपछि आयोगले दुई पूर्वअस्पताल प्रमुखसहित १० जनाविरुद्ध मुद्दा चलाएको हो ।              

अख्तियारका अनुसार आर्थिक वर्ष २०८०/०८१ मा अस्पतालका आठ वटा बिल काउन्टरबाट कूल तीन करोड ८७ लाख ६६ हजार रुपैयाँ संकलन भएको सफ्टवेयरमा देखिए पनि अस्पतालको आधिकारिक अभिलेखमा भने तीन करोड ४८ लाख ८९ हजार रुपैयाँ मात्र दाखिला भएको पाइएको थियो । सफ्टवेयरमा देखिएको र बैंकमा जम्मा गरिएको रकमबीचको ३८ लाख ७७ हजार रुपैयाँ कर्मचारीहरूले बदनियतपूर्वक हिनामिना गरेको आयोगले जनाएको छ ।                

अस्पतालका तत्कालीन प्रमुखहरू डा नागेन्द्रप्रसाद यादव र डा. सरोज यादवले सफ्टवेयरमार्फत दैनिक आम्दानीको विवरण हेर्न सक्ने अधिकार भए पनि रकम कम जम्मा भएको जानकारी हुँदाहुँदै मौन बसेर अन्य कर्मचारीलाई भ्रष्टाचारमा सघाएको अख्तियारको दाबी छ ।              

यस प्रकरणमा आयोगले अस्पतालका तत्कालीन प्रमुखद्वय डा. नागेन्द्र र डा. सरोज, तत्कालीन प्रशासन प्रमुख अशोककुमार सिंह र तत्कालीन लेखा प्रमुख अशोककुमार यादवलाई जनही ३८ लाख ७७ हजार रुपैयाँ बिगो कायम गरी विपक्षी बनाएको छ ।                  

त्यस्तै, बिल काउन्टरमा कार्यरत अहेब श्यामकुमार मण्डललाई रु २५ लाख ४७ हजार ४१७, सहायक कर्मचारीहरू सरस्वतीकुमारी यादवलाई रु पाँच लाख दुई हजार ८१३, अजयकुमार मण्डललाई रु तीन लाख ७९ हजार २१, पूजाकुमारी यादवलाई रु दुई लाख ८८ हजार २२९ र रोशनकुमार यादवलाई रु एक लाख ६४ हजार ६५९ बिगो कायम गरी मुद्दा दायर गरिएको छ । आयोगका प्रवक्ता सुरेश न्यौपानेका अनुसार यस भ्रष्टाचार प्रकरणमा संलग्न तत्कालीन लेखा प्रमुख रत्नप्रसाद मण्डलको मृत्यु भइसकेको भए पनि सरकारी बिगो असुल गर्ने प्रयोजनका लागि उनकी श्रीमती मुस्कानकुमारी मण्डललाई प्रतिवादी बनाइएको छ ।