१६ वर्षमुनिका बालबालिकालाई सामाजिक सञ्जाल प्रतिबन्ध

 दुबई । स्पेनका प्रधानमन्त्री पेद्रो सान्चेजले १६ वर्षमुनिका बालबालिकालाई सामाजिक सञ्जाल प्रयोग गर्न प्रतिबन्ध लगाउने योजना अघि बढाउने घोषणा गरेका छन् ।                    

दुबईमा आयोजित एक अन्तर्राष्ट्रिय सम्मेलनमा बोल्दै उनले पोर्नोग्राफी, हिंसा, दुरुपयोग र लतजस्ता हानिकारक सामग्रीबाट बालबालिकालाई जोगाउन यो कदम चाल्न लागिएको बताएका हुन् ।                      

सान्चेजका अनुसार सामाजिक सञ्जाल प्लेटफर्महरूले केवल ‘चेकबक्स’मा आधारित उमेर पुष्टि होइन, प्रभावकारी र व्यावहारिक उमेर प्रमाणीकरण प्रणाली लागू गर्नुपर्ने छ । ‘हाम्रा बालबालिका एक्लै सामना गर्न नसक्ने वातावरणमा प्रवेश गरिरहेका छन् । यो लत, दुरुपयोग, हिंसा र हेरफेरको संसार हो, जसलाई अब स्वीकार गर्न सकिँदैन,’ उनले भने ।                      

प्रधानमन्त्रीले प्रविधि कम्पनीका प्रमुख कार्यकारीहरूलाई अवैध वा घृणात्मक सामग्री हटाउन असफल भए आपराधिक जिम्मेवारी तोक्ने गरी कानून संशोधन गर्ने प्रतिबद्धता पनि जनाएका छन् । सरकारले आगामी हप्तादेखि लागू हुने गरी पाँच बुँदे सुधार प्याकेज स्वीकृत गर्ने तयारी गरेको छ ।                  

यद्यपि सान्चेजको गठबन्धन सरकारसँग संसद्मा स्पष्ट बहुमत नरहेकाले विधेयक पारित गराउन चुनौती रहने देखिन्छ । यसअघि अष्ट्रेलियाले फेसबुक, इन्स्टाग्राम र टिकटकजस्ता प्लेटफर्ममा किशोर प्रयोगकर्तामाथि प्रतिबन्ध लगाउँदै विश्वमै पहिलो उदाहरण प्रस्तुत गरेको थियो । फ्रान्स र पोर्चुगलले पनि यस्तै कदम चाल्ने प्रयास गरिरहेका छन् ।