सिटिजन लाइफको एमडीआरटी २०२६ सम्मान तथा प्रशिक्षण

काठमाडौं । सिटिजन लाइफ इन्स्योरेन्स कम्पनीले एमडीआरटी २०२६ सम्मान तथा प्रशिक्षण कार्यक्रम सम्पन्न गरेको छ । पोखरामा फागुन ५ देखि ७ सम्म आयोजित कार्यक्रममा ७० जना सिटिजन लिडरहरूलाई सम्मान गरिएको छ ।
जसअन्तर्गत ६७ जना एमडीआरटी, २ जना सीओटी (कोर्ट अफ द टेबल) तथा १ जना टीओटी (टप अफ द टेबल) क्वालिफायर रहेका थिए । कार्यक्रममा सिनियर एजेन्सी म्यानेजर, उत्कृष्ट कार्यसम्पादनका आधारमा छनोट भएका शाखा प्रमुख तथा क्षेत्रीय प्रमुखहरूको पनि सहभागिता थियो ।
कार्यक्रमको उद्देश्य उत्कृष्ट कार्यसम्पादन गर्ने लिडरहरूलाई सम्मान गर्नुका साथै आगामी व्यावसायिक लक्ष्य तथा रणनीतिबारे छलफल र सशक्त प्रशिक्षण प्रदान गर्नु रहेको कम्पनीले जनाएको छ । कार्यक्रमअन्तर्गत ‘द सेक्रेट अफ प्रोग्रेसिभ लाइफ’ विषयमा प्रख्यात सेल्स कोच तथा मोटिभेसनल स्पिकर डा. रबिन कटवालले विशेष प्रशिक्षण सत्र सञ्चालन गरेका थिए । जसले सहभागीलाई व्यक्तिगत तथा व्यावसायिक विकासका लागि प्रेरित गरेको कम्पनीले जनाएको छ ।
कार्यक्रममा कम्पनीका प्रशिक्षण विभाग प्रमुख कुवेर पाठक, प्रमुख वित्तीय अधिकृत गोपाल पंगेनी, प्रमुख बजार व्यवस्थापन अधिकृत भुषण रिमाल तथा प्रमुख कार्यकारी अधिकृत पोषकराज पौडेलले आ–आफ्नो प्रस्तुति तथा मार्गदर्शन प्रदान गरेका छन् ।
कार्यक्रममा कम्पनीका ब्रान्ड एम्बेसडरहरू मदनकृष्ण श्रेष्ठ तथा हरिवंश आचार्यको विशेष उपस्थिति थियो । उनीहरूले सहभागीहरूलाई सम्बोधन गर्दै हास्य व्यंग्यमार्फत उत्साह थप्नुका साथै एमडीआरटी क्वालिफायरहरूलाई सम्मान गरेका छन् ।
समापन समारोहमा प्रमुख कार्यकारी अधिकृत पोषकराज पौडेलले कम्पनीको निरन्तर प्रगति र सफलताको प्रमुख आधार सिटिजन लिडरहरूको समर्पण, प्रतिबद्धता र उत्कृष्ट कार्यसम्पादन रहेको उल्लेख गरे । उनले आगामी दिनहरूमा अझै उच्च उपलब्धि हासिल हुने विश्वास व्यक्त गरे ।