अरुणिमा माविको अभिभावक दिवसमा विशिष्ट व्यक्तित्व सम्मानित

काठमाडौँ । काठमाडौँको बौद्ध कुमारीगालमा रहेको अरुणिमा माध्यमिक विद्यालयले अभिभावक दिवसको अवसरमा समाजका विभिन्न क्षेत्रमा विशिष्ट योगदान दिने व्यक्तित्वहरूलाई सम्मान गरेको छ ।

सम्मानित हुनेमा प्रतिष्ठानका संरक्षकसमेत रहेका शिक्षाप्रेमी एवं समाजसेवी बुद्धिबहादुर थापा (अमिर) थापा, शिक्षाविद् एवं नेपाल सरकारका पूर्व सहसचिव विश्वनाथ अर्याल र समाजसेवी शताब्दी पुरुष नारायणप्रसाद लामिछाने छन् । 

कार्यक्रमका प्रमुख अतिथि वरिष्ठ चित्रकार हरिप्रसाद शर्मा, अरुणिमा शैक्षिक प्रतिष्ठानका अध्यक्ष भिमानन्द ढुङ्गाना र कार्यकारी प्रिन्सिपल ईश्वरीप्रसाद लामिछाने विशिष्ट व्यक्तित्वहरूलाई सम्मान गरिएको छ। 

कार्यक्रममा अरुणिमा स्मारिका अङ्क- ८ को लोर्कापण पनि गरिएको थियो भने विद्यार्थीहरूले गीत, नृत्य, नाटक, योग, तेक्वान्दो लगायतका विविध आर्कषक प्रस्तुति देखाएका थिए । कार्यक्रमका प्रमुख अतिथि वरिष्ठ चित्रकार हरिप्रसाद शर्माले विद्यार्थीहरूका सिर्जनात्मक क्रियाकलापबाट विद्यालयले उपलब्ध गराएको समय सापेक्ष सैद्धान्तिक एवं व्यवहारिक शिक्षा प्रतिबिम्बित भएको विचार व्यक्त गरे ।

सम्मानित व्यक्ति शिक्षाविद् एवं नेपाल सरकारका पूर्व सहसचिव विश्वनाथ अर्यालले विद्यार्थीहरूको दैनिकीको बारेमा अभिभावकहरूले मिहिन चासो राख्नुपर्ने बताए ।  

अरुणिमा शैक्षिक प्रतिष्ठानका अध्यक्ष भिमानन्द ढुङ्गानाले प्रतिष्ठानको शैक्षिक सफलतामा सरोकारवाला सबैको साथ सहयोगका लागि आभार व्यक्त गर्दै आगामी दिनमा थप प्रविधिमैत्री एवं समय सापेक्ष शिक्षा उपलब्ध गराइने प्रतिबद्धता व्यक्त गरे ।

प्रतिष्ठानका कार्यकारी प्रिन्सिपल ईश्वरीप्रसाद लामिछानेले विद्यार्थीहरूको सिर्जनात्मक पक्षलाई विद्यालयले उच्च प्राथमिकता दिँदै आएको जानकारी गराए ।

विद्यालयका प्रिन्सिपल बुद्धिप्रसाद रेग्मीले विद्यालयको शैक्षिक उपलब्धी, प्रशासनिक व्यवस्थापन तथा अतिरिक्त क्रियाकलाप र विद्यालयले प्रदान गर्दै आएका सुविधाहरुबारे जानकारी दिएका थिए ।