आचारसंहिता उल्लंघन बढ्दो, मोरङमा २९ उजुरी दर्ता

विराटनगर । आगामी निर्वाचन नजिकिँदै जाँदा मोरङ जिल्लामा निर्वाचन आचारसंहिता उल्लंघनका घटनाहरू बढ्दै गएका छन् । उम्मेदवार तथा राजनीतिक दलहरूले प्रचार–प्रसारलाई तीव्र बनाउँदा आचारसंहिता–विपरीत गतिविधिहरू भएको भन्दै विभिन्न उजुरीहरू दर्ता हुन थालेका छन् । निर्वाचन आचारसंहिता अनुगमन समिति मोरङका अनुसार हालसम्म लिखित र मौखिक गरी २९ वटा उजुरी दर्ता भइसकेका छन् । ती उजुरीका आधारमा सम्बन्धित उम्मेदवार तथा दलहरूलाई सचेत गराइएको छ ।
अनुगमन समितिका पदाधिकारीहरूले भनेका छन् कि माइकिङ नियमविपरीत गर्ने, अनुमति नलिई जुलुस वा ¥याली आयोजना गर्ने, सार्वजनिक स्थानमा ब्यानर र तोरण टाँग्ने, डीजे वा लाउडस्पिकर प्रयोग गरी ध्वनि प्रदूषण फैलाउने गतिविधि उल्लेख्यरूपमा बढेका छन् । विशेषगरी कोशी प्रदेशको राजधानी विराटनगरमा यस्तो गतिविधि बढी देखिएको छ । सहरका मुख्य चोक–गल्लीमा सिटी रिक्सामा स्पिकर जडान गरी प्रचार सामग्री बजाउँदै वडा–वडामा घुम्ने क्रम जारी छ ।
स्थानीय बासिन्दाले ध्वनि प्रदूषणका कारण दैनिक जीवन प्रभावित भएको गुनासो गरेका छन् । विद्यालय, अस्पताल तथा धार्मिक स्थलनजिकै ठूलो साउण्डमा प्रचार सामग्री बजाइएको भन्दै सर्वसाधारण असन्तुष्ट देखिएका छन् । आचारसंहिताले तोकेको समय र ध्वनि मापदण्डको बेवास्ता गर्दा निर्वाचन वातावरण अस्वस्थ बन्दै गएको सरोकारवालाहरूको भनाइ छ ।
जिल्ला प्रशासन कार्यालय मोरङले मतदानको एक हप्ताअघि मदिरा बेचबिखन तथा सेवनमा रोक लगाएको थियो । तर विराटनगरको तीनपैनी चोक क्षेत्रमा प्रहरी बिटनजिकै मदिरा पसल सञ्चालन भइरहेको पाइएको छ । प्रशासनलाई यसबारे ध्यानाकर्षण गराइएको छ ।
निर्वाचन आयोगले फागुन ४ गतेदेखि मात्रै औपचारिक प्रचार–प्रसार गर्न पाइने व्यवस्था गरे पनि धेरै उम्मेदवारले मापदण्ड पालना नगरेको अनुगमन समितिले जनाएको छ । मुख्य निर्वाचन अधिकृतको कार्यालय मोरङका अनुसार हालसम्म दुई उम्मेदवारले मात्र प्रचारका लागि सवारीसाधन प्रयोग गर्न आधिकारिक अनुमति लिएका छन् । अन्य उम्मेदवारले अनुमति नलिई सवारीसाधन प्रयोग गरे कारबाही गरिने चेतावनी दिइएको छ ।
अनुगमन समिति मोरङका संयोजक तथा सहायक प्रमुख जिल्ला अधिकारी सरोज कोइरालाले आचारसंहिता उल्लंघनका घटनालाई गम्भीरतापूर्वक लिइएको बताउँदै निगरानी बढाइएको र आवश्यक परे कानुनी कारबाही गरिने स्पष्ट पारे । उनले प्रचार–प्रसारका क्रममा सवारीसाधन प्रयोग गर्नुअघि अनुमति लिन, ध्वनि प्रणालीको प्रयोगमा तोकिएको समय र मापदण्ड पालन गर्न तथा सार्वजनिक सम्पत्तिमा अनधिकृत पोस्टर, ब्यानर वा तोरण नराख्न सबैलाई आग्रह गरे ।
स्वच्छ, निष्पक्ष, भयरहित र स्वतन्त्र निर्वाचन सम्पन्न गराउन सबै राजनीतिक दल, उम्मेदवार, समर्थक तथा नागरिकले आचारसंहिता कडाइका साथ पालना गर्नुपर्ने उनले जोड दिए । आगामी दिनमा अनुगमन अझ कडाइका साथ अघि बढाइने र उल्लंघन गर्ने जो–कोहीमाथि कानूनी प्रक्रिया अघि बढाइने समितिले जनाएको छ ।