केही समयमै ‘इतिहासकै खतरनाक आक्रमण’ गर्ने इरानको चेतावनी

काठमाडौँ । इस्लामिक रिभोलुसनरी गार्ड कोर्प्स (आईआरजीसी) ले अमेरिकाका सैन्य अड्डा र इजरायलमाथि आक्रमण गर्ने चेतावनी दिएको छ।

आईआरजीसीले जारी गरेको विज्ञप्तिमा भनिएको छ, “इस्लामिक गणतन्त्र इरानको सशस्त्र सेनाको इतिहासकै सबैभन्दा खतरनाक आक्रमण अब केही क्षणमै कब्जा गरिएका क्षेत्र र अमेरिकी आतंकवादी अड्डाहरूमाथि सुरु हुनेछ।”

यो चेतावनी अयातुल्लाह अली खामेनीको मृत्यु भएको खबर सार्वजनिक भएपछि जारी गरिएको हो। इरानी सरकारी स्रोतका अनुसार खामेनीको निधनको शोकमा सरकारले ४० दिनको राष्ट्रिय शोक घोषणा गरेको छ।

इरानका सञ्चारमाध्यम तस्निम र फार्स समाचार एजेन्सीले इजरायल–अमेरिकाको आक्रमणमा खामेनीसँगै उनकी छोरी, ज्वाइँ, नातिनी र बुहारीको पनि मृत्यु भएको दाबी गरेका छन्।

शनिबार गरिएको हवाई आक्रमणमा खामेनीको निवास पूर्ण रूपमा ध्वस्त भएको जनाइएको छ।

यसको जवाफस्वरूप इरानले पनि शनिबार नै इजरायलमाथि करिब ४०० वटा क्षेप्यास्त्र प्रहार गरेको र कतार, कुवेत, जोर्डन, बहराइन, साउदी अरेबिया र संयुक्त अरब इमिरेट्समा रहेका अमेरिकी अड्डालाई निसाना बनाएको जनाएको छ।

त्यसैगरी इरानले संयुक्त अरब इमिरेट्सको सबैभन्दा बढी जनसंख्या भएको सहर दुबईमा पनि क्षेप्यास्त्र प्रहार गरेको इरानी सञ्चारमाध्यमहरूले जनाएका छन्।