इरानी आक्रमणमा एक नेपालीको मृत्यु

काठमाडौं । इरानी आक्रमणमा संयुक्त अरब इमिरेट्स (यूएई) मा गोरखाका एक युवकको ज्यान गएको छ। भीमसेन थापा गाउँपालिका–७ बोर्लाङ ठाँटीका २९ वर्षीय दिवस श्रेष्ठ को आइतबार अबुधाबीस्थित जायेद इन्टरनेशनल एयरपोर्टमा ड्रोन निष्क्रिय पार्ने क्रममा मृत्यु भएको हो ।
अबुधाबीस्थित राजदूतावासले यूएईको परराष्ट्र मन्त्रालयबाट आधिकारिक जानकारी प्राप्त भएको जनाउँदै श्रेष्ठको निधनप्रति दुःख व्यक्त गरेको छ । दूतावासले जारी गरेको विज्ञप्तिमा परिस्थिति सहज भएपछि पार्थिव शरीर यथाशीघ्र स्वदेश फिर्ता लैजान आवश्यक सहजीकरण गरिने उल्लेख छ ।
यूएईको रक्षा मन्त्रालयले सार्वजनिक गरेको विवरणअनुसार उक्त आक्रमणमा नेपाल, बंगलादेश र पाकिस्तानका एक–एक जना नागरिकको मृत्यु भएको छ । श्रेष्ठ मिडल इस्ट कम्पनीमार्फत सेक्युरिटी गार्डका रूपमा कार्यरत थिए । चार वर्षदेखि वैदेशिक रोजगारीमा रहेका उनी एक वर्षअघि दसैं मनाएर पुनः दुबई फर्किएदेखि घर आएका थिएनन् ।
गोरखामा दिवसका परिवारले घटनाको औपचारिक जानकारी सोमबार बिहान मात्र पाएको जनाएको छ । अघिल्लो दिन एक जना नेपालीको मृत्यु भएको अपुष्ट खबर सुने पनि पहिचान खुलेको थिएन । मृतकका बाबु चामबहादुर श्रेष्ठका अनुसार छोरासँग पछिल्लोपटक शनिबार कुराकानी भएको थियो । भोलिपल्ट साथीमार्फत मोबाइल हराएको र भागदौडका क्रममा खुट्टामा चोट लागेको खबर मात्र सुनेका थिए । 
परराष्ट्र मन्त्रालय हुँदै आएको सूचना जिल्ला प्रशासन कार्यालय गोरखाले वडाध्यक्ष नारायण श्रेष्ठमार्फत परिवारसम्म पु¥याएको हो । खबर सार्वजनिक भएसँगै श्रेष्ठको घरमा आफन्त र छिमेकीहरूको भीड लागेको छ । दूतावासले यूएईमा रहेका नेपाली नागरिकलाई संयमता अपनाउन, सुरक्षित स्थानमा बस्न र यूएई सरकारले जारी गरेका सुरक्षासम्बन्धी सबै मापदण्ड पालना गर्न अनुरोध गरेको छ ।