मोरङमा निर्वाचन तयारी अन्तिम चरणमा

विराटनगर । प्रतिनिधिसभा सदस्य निर्वाचनका लागि मोरङ जिल्लामा आवश्यक सम्पूर्ण तयारी अन्तिम चरणमा पुगेको छ । मुख्य निर्वाचन अधिकृतको कार्यालयका अनुसार बिहीबार हुने मतदानका लागि आवश्यक सामग्रीहरू सम्बन्धित मतदान केन्द्रमा पु¥याइसकिएको छ भने मतदानस्थल निर्माण र केन्द्र व्यवस्थापनको काम तीव्र गतिमा अघि बढाइएको छ ।
कार्यालयका अनुसार मतपत्र, मतपेटिका, घेराबारा, मतदाता नामावली, सुरक्षा सिललगायत सम्पूर्ण निर्वाचन सामग्री सम्बन्धित केन्द्रहरूमा पठाइसकिएको छ । हाल मतदान स्थल निर्माण तथा मतदान केन्द्र व्यवस्थापनको कार्य जारी छ भने बुधबारसम्म सबै स्थानमा निर्माण कार्य सम्पन्न गरिसक्ने तयारी छ ।
सहायक निर्वाचन अधिकृत मणिराम पोखरेलका अनुसार मंगलबार बेलुकासम्म सबै मतदान केन्द्रमा मतदान अधिकृत, सहायक मतदान अधिकृत, कर्मचारी तथा सुरक्षाकर्मीहरू पुगिसक्नेछन् । उनीहरूले सम्बन्धित राजनीतिक दलका प्रतिनिधिसँग छलफल गरी मतदान स्थलको मुचुल्का तयार गर्ने, मौन अवधिसम्बन्धी सूचना जारी गर्ने तथा सुरक्षासम्बन्धी विषयमा सहमति जुटाई औपचारिक सूचना प्रकाशन गर्ने कार्यक्रम तय गरिएको छ ।
निर्वाचनलाई शान्तिपूर्ण रूपमा सम्पन्न गर्न नेपाल प्रहरी, सशस्त्र प्रहरी बल र नेपाली सेनालाई एकीकृत सुरक्षा योजनाअनुसार परिचालन गरिएको छ । गाउँ–गाउँमा सुरक्षा उपस्थिति बढाइएको छ भने संवेदनशील तथा अति संवेदनशील क्षेत्रमा विशेष निगरानी राखिएको छ । नेपाली सेनाले पनि सुरक्षा गस्तीलाई व्यापक बनाएको जनाएको छ ।
यसैबीच मंगलबारदेखि लागू हुने मौन अवधिको पूर्ण पालना गराउन तथा निर्वाचन आचारसंहिता उल्लंघन हुन नदिन प्रहरीले माइकिङमार्फत सर्वसाधारणलाई सचेत गराउन सुरु गरेको छ । कुनै पनि प्रकारका अवाञ्छित गतिविधि हुन नदिन सुरक्षा संयन्त्र उच्च सतर्कतामा रहेको बताइएको छ ।
निर्वाचन सुरक्षालाई थप सुदृढ बनाउन फागुन १८ गते राति १२ बजेदेखि २१ गते राति १२ बजेसम्म ७२ घण्टाका लागि नेपाल–भारत सीमा सिल गर्ने तयारी रहेको सुरक्षा निकायले जनाएको छ । सीमा सिल अवधिमा आपतकालीन अवस्थाबाहेक आवतजावतमा पूर्ण रोक लगाइनेछ ।
मोरङ जिल्लामा प्रतिनिधिसभाका ६ वटा निर्वाचन क्षेत्र छन् । जिल्लाभर ८९० मतदान केन्द्र तोकिएका छन् भने ७ लाख ८३ हजार ५० मतदाताले यस निर्वाचनमा मताधिकार प्रयोग गर्नेछन् ।