विश्वकप फुटबलः ९९ दिन बाँकी

काठमाडौँ । आगामी जुन ११ बाट मेक्सिको सिटीको ऐतिहासिक एस्टाडियो एजेका स्टेडियमबाट उद्घाटन खेल हुने विश्वकप फुटबल शुरू हुन अब जम्मा ९९ दिन बाँकी छ । 
जुलाई १९ मा अमेरिकाको न्यू जर्सीको मेटलाइफ स्टेडियममा फाइनल खेल हुने यस खेलमा संसारभरका ४८ वटा टोलीले प्रतिस्पर्धा गर्नेछन् । ३९ दिनको अवधिमा १०४ वटा खेल हुने विश्वकपको चर्चा शुरू भइसकेको छ ।
अबको १०० दिनपछि इतिहासकै सबैभन्दा ठूलो फिफा विश्वकपको काउन्टडाउन शुरू भएको छ । अमेरिका, क्यानडा र मेक्सिको गरी तीनवटा देशका १६ वटा फरक शहरहरूमा ४८ टोलीले खेल्ने यो महाकुम्भ आफैँमा ऐतिहासिक हुनेछ । आगामी जुन ११ देखि शुरू हुने यो प्रतियोगितामा पहिलो बल प्रहार हुनुअघि धेरै विषयहरूमा छलफल भइरहेका छन् ।
मैदानबाहिर केही राजनीतिक र सुरक्षाका विषयहरू चर्चामा रहे पनि सबैको मुख्य चासो खेलमैदानमै केन्द्रित छ । यसपटकको खेल उत्सवका केही मुख्य प्रश्नहरूको उत्तर खोज्ने प्रयास गरेको छ ।
उपाधिको दाबेदार को ?
युरोपेली च्याम्पियन स्पेनलाई यसपटक सबैभन्दा बलियो दाबेदार मानिएको छ । छनोट चरणमा टर्कीसँग बराबरी खेल्नुबाहेक स्पेनको यात्रा निकै उत्कृष्ट रह्यो । पेड्रि, फाबियन रुइज र सन् २०२४ को बालोन डी’ओर विजेता रोड्रिले सम्हालेको स्पेनको मिडफिल्ड निकै शक्तिशाली छ । साथै, बार्सिलोनाका युवा स्टार लामिन यमल उनीहरूको मुख्य हतियार हुन् ।
त्यस्तै, इङ्गल्याण्डको यो पुस्ताले अन्ततः कुनै ठूलो उपाधि जित्ने अपेक्षा गरिएको छ । थोमस टुचेलको प्रशिक्षणमा रहेको इङ्गल्याण्डले छनोटका सबै खेल जितेर विश्वकपमा स्थान सुरक्षित गरेको हो । जुड बेलिङ्घम, फिल फोडेन र युरोपका अग्रणी गोलकर्ता ह्यारी केनजस्ता स्टारहरूलाई कसरी व्यवस्थापन गर्ने भन्ने टुचेलका लागि सुखद चुनौती हुनेछ ।
साबिक उपविजेता फ्रान्स पनि उत्तिकै बलियो छ । डिडियर डेसचाम्सको टोलीसँग केलियन एमबाप्पे, ब्राड्ली बारकोला र ह्युगो एकिटिकेजस्ता डरलाग्दा स्ट्राइकरहरू छन् । डिफेन्डिङ च्याम्पियन अर्जेन्टिनालाई बिर्सन मिल्दैन, जसले दक्षिण अमेरिकी छनोटमा दोस्रो भएको इक्वेडरभन्दा ९ अंकको अग्रता बनाउँदै समूह जितेको थियो । यता ब्राजिलले छनोटमा केही संघर्ष गरे पनि भिनिसियस जुनियर र चेल्सीका युवा खेलाडी एस्तेभाओका कारण उनीहरू जोसुकैका लागि घातक बन्न सक्छन् ।

इङ्गल्याण्ड र स्कटल्याण्डको सम्भावना
बीबीसीका खेल संवाददाता सामी मोकबेलका अनुसार अमेरिकाको अत्यधिक गर्मी इङ्गल्याण्डका लागि निर्णायक कारक बन्न सक्छ । कागजमा इङ्गल्याण्डको टोली फाइनलसम्म पुग्ने क्षमता राख्छ तर लामो घरेलु सिजनपछि खेलाडीहरूले त्यहाँको तापक्रमलाई कसरी झेल्छन् भन्ने कुराले उनीहरूको यात्रा तय गर्नेछ ।
यता स्कटल्यान्डका लागि भने पहिलो पटक समूह चरण पार गर्नु नै मुख्य सपना हुनेछ । प्रमुख खेल लेखक टम इंगलिश भन्छन्, ‘स्कटल्याण्डसँग विश्वस्तरका खेलाडी भए पनि अहिलेसम्म समूह चरण पार गर्न सकेका छैनन् ।’ बोस्टनमा हुने पहिलो खेलमा हाइटीलाई हराउन सकेमा स्कटल्याण्डले इतिहास रच्ने सम्भावना रहन्छ ।

यी हुन् नजरमा रहने खेलाडीहरू
सबैको नजर फेरि पनि लियोनेल मेस्सीमै हुनेछ । ३९ वर्षको उमेरमा पनि मेस्सीले इन्टर मियामीका लागि पछिल्लो सिजन ४३ गोल गरेका थिए । आफ्नै ‘दोस्रो घर’जस्तै बनेको अमेरिकामा अर्जेन्टिनालाई उनी फेरि सफल बनाउन चाहन्छन् ।
स्पेनका १८ वर्षीय लामिन यमल अर्का मुख्य आकर्षण हुन् । यूरो २०२४ मा तहल्का पिटेका उनी यसपटक विश्वकपमा आफ्नो जादु देखाउन आतुर छन् । यस्तै, फ्रान्सेली कप्तान केलियन एमबाप्पे र ब्राजिलका उदाउँदा तारा एस्तेभाओ विलियनमाथि पनि विश्वभरका फुटबल प्रेमीहरूको नजर रहनेछ ।
को बन्न सक्छ ‘सरप्राइज प्याकेज’ ?
सन् १९९८ पछि पहिलो पटक विश्वकप खेल्न लागेको नर्वेले यसपटक सबैलाई चकित पार्न सक्छ । म्यानचेस्टर सिटीका अर्लिङ हालान्डले छनोटका ८ खेलमा १६ गोल गर्दै टोलीलाई अपराजित राखेका थिए । यस्तै, फिफा वरीयतामा आठौँ स्थानमा रहेको मोरक्को र मोहम्मद सलाहको नेतृत्वमा रहेको इजिप्टले पनि यसपटक ठूलो उलटफेर गर्न सक्ने अनुमान गरिएको छ । एसियाबाट जापानले छनोट चरणमा १६ खेलमा मात्र ३ गोल खाएर आफ्नो रक्षापङ्क्ति निकै बलियो रहेको साबित गरिसकेको छ ।