दुई मतदान केन्द्रमा सबै निर्वाचन कर्मचारी महिला

लमजुङ । आसन्न निर्वाचनका लागि लमजुङका दुई वटा मतदान केन्द्रमा महिला कर्मचारी मात्रै खटिने भएका छन् । सदमुकाम बेंसीसहरमा रहेको जनविकास माध्यामिक विद्यालय मतदान स्थलमा रहेका दुई वटा केन्द्रमा महिला कर्मचारीले मात्रै जिम्मवारी पाएका मुख्य निर्वाचन अधिकृतको कार्यालयले जनाएको छ ।
जनविकास माविको दुवै केन्द्रमा मतदान अधिकृत, सहायक मतदान अधिकृत, सहायक कर्मचारी र सहयोगी कर्मचारी सवै महिला कर्मचारी खटिने छन् । जनविकास ‘क’ मा ५८८ र ‘ख’ केन्द्रमा ६३७ मतदाता छन् । ‘क’ केन्द्रमा एकीकृत सेवा कार्यालयको प्रमुख मीताकुमारी थापाले मतदान अधिकृतको जिम्मेवारी पाएकी छिन् भने सहायक मतदान अधिकृतमा भेटेरिनरी अस्पताल तथा पशुसेवा कार्यालयकी अधिकृत मेलिना खड्काको अगुवाइ रहनेछ । साथै, केन्द्रको सहायक कर्मचारीमा सीता थापा पन्थी, शान्ति गुरुङ, लक्ष्मी रिमाल र सहयोगी कर्मचारीमा योचिनी गुरुङ रहेका छन् । 
साथै, ‘ख’ मतदान केन्द्रमा मध्यनेपाल नगरपालिकाकी अधिकृत मञ्जु थापा मगर मतदान अधिकृत रहेकी छिन् भने सहायक मतदान अधिकृतमा मस्र्याङ्दी गाउँपालिकाकी चन्द्रकुमारी गुरुङ छिन् । सहायक कर्मचारीमा सरिता थारू, बविता विश्वकर्मा, राधा ज्ञावाली र सहयोगी कर्मचारीमा शिलाकुमारी श्रेष्ठ रहेका छन् ।
मुख्य निर्वाचन अधिकृतको कार्यालयले १ सय ९२ मतदान केन्द्रमा खटिने मतदान अधिकृतसहित कर्मचारीहरूको नामावली सार्वजनिक गरिसकेको छ । निजामती कर्मचारी र प्राथामिक तहका शिक्षकहरूलाई समेत समावेश गरी एक हजार १ सय ५२ जना निर्वाचनमा खटिएका छन् ।  लमजुङमा १३० मतदान स्थलमा १९२ मतदान केन्द्र र एउटा अस्थायी मतदान केन्द्र रहेका छन् ।
लमजुङमा ११ दल र एक स्वतन्त्र गरी १२ जना उम्मेदवार रहेकोमा एक जना मात्र प्रत्यक्षतर्फ महिला उम्मेदवार छन् । एक लाख ३७ हजार १ सय २४ जना मतदातामा महिला मतदाता ६९ हजार ५ सय २४ र पुरुष मतदाता ६७ हजार ६ सय रहेका छन् । पुरुषभन्दा महिला मतदाताको संख्या एक हजार ९ सय २४ ले बढी छ ।
लमजुङमा स्वयंसेवकसहित एक हजार ७ सय ५० कर्मचारी खटिनेछन् । एउटा निर्वाचन क्षेत्र भएको लमजुङमा मतदान अधिकृत, सहायक मतदान अधिकृत र अन्य कर्मचारी गरी करिब एक हजार ७ सय ५० कर्मचारी खटिने मुख्य निर्वाचन अधिकृतको कार्यालयले जनाएको छ । यहाँ १ सय ३० मतदान स्थल, १ सय ९२ मतदान केन्द्र र एउटा अस्थायी मतदान केन्द्र छन् । लमजुङमा १ सय ९३ मतदान अधिकृत, १ सय ९३ सहायक मतदान अधिकृतसँगै एउटा मतदान केन्द्र, सहायक कर्मचारी र स्वयंसेवक तीन÷तीन जना र एक जना कार्यालय सहयोगी गरी नौ जना कर्मचारी खटाइएको सहायक निर्वाचन अधिकृत रामबन्धु गौतमले बताए ।
निजामती कर्मचारीबाट मतदान अधिकृत र सहायक मतदान अधिकृतमा प्राथमिकता दिइएको र अपुग कर्मचारीलाई शिक्षकबाट ल्याइएको छ । मतदान स्थलको पहिलो घेरा र मतपेटिकाको सुरक्षामा नेपाल प्रहरी र बाहिरी घेरामा आवश्यकताका आधारमा सशस्त्र प्रहरी र नेपाली सेनासमेत खटिनेछ । लमजुङमा ३० मतदान स्थल अति संवेदनशीलको सूचीमा रहेका छन् । सुरक्षा चुनौतीको आधारमा मतदान स्थललाई अति संवेदनशील, संवेदनशील र सामान्य गरी तीन भागमा वर्गीकरण गरिएको छ । सोही अनुसार ७७ मतदान स्थललाई संवेदनशीलको सूचीमा राखिएको छ । २३ मतदान स्थल सामान्य रहेको सुरक्षा समितिको विश्लेषण छ ।